Kulturë
Thani Naqo: I fundit i shalëgjatëve
E premte, 22.06.2012, 07:03 PM
Thani Naqo
FRAGMENT NGA ROMANI "I FUNDMI I SHALËGJATËVE" (ku shpaloset dhimbja mbarë kombëtare)
x.
Hoqa çantën
nga gjunjët dhe rehatova më mirë shpinën mbi derën e berberanës të Shejtanit. Nuk
di sa minuta kisha fjetur. Sytë më digjnin nga pagjumësia, por mendjen e kisha
të kthjellët; menjëherë dora më shkoi në xhepin e brendshëm të xhaketës. Kisha
hallin e parave. Nuk më kishin vjedhur dhe, për t’u siguruar, u dhashë rrugë gishtave
të kontrollonin përgjatë çantës; e gjetën kutinë ku kisha futur lekët e tjera.
“Paraja
shqiptare nuk shkon në Evropë – më tha Iloja ditën kur shita tufën e dhive – Që
të çash përmes Evropës duhen marka gjermane ose dollarë amerikanë. Hapi sytë mirë
mos të ta hedhin: në Shqipëri ka plasur valuta fallco. Ti, o, I Fundmi i Shalëgjatëve,
nuk di ç’bëhet poshtë malit dhe mos e pësofsh siç e pësova unë. Xhambazët e
parave ta hedhin kur të duash” dhe Iloja, ustai i fshatit, më dha këshillën e
fundit:
“Mos i këmbe
paratë tek mafiozët e valutës, por shko në bankë. Qeveritë janë ndruar tri herë
gjer tani por, sido që janë, ato e kontrollojnë paranë e tyre.”
Atë ditë që
Iloja më dha këto këshilla, qielli ishte i kthjellët, teto Dabucka mbuloi
tavolinën me një mbulesë të re duke thënë “sa mirë që kemi përpara dy javë me
mot të mirë. Kam hallin të më thahen oshafet prej kumbulle, mollçine dhe gorice.
” Ishim në verandën e shtëpisë së saj dhe ajo na bëri kafe dhe, për çudi, nuk
solli gotat trembëdhjetë gramshe, por gota njëqindgramshe, me fron të hollë e
gjatë. “Këto gota – thoshte teto Dabucka – i solli im’shoq kur bënte kurbetin në
Austri. Fronin e kanë njëlloj si takat e sandaleve vesh Marjana e Lonit sa herë
ajo dhe Loni, shkojnë në qytet për provat e festivalit të Gjirokastrës,” sepse
Marjana hiqte vallen grarishte të Vjelëseve të Mollëve, kurse Loni vallen “Lojë
me shputat e ariut.” Kjo valle të bënte qeshje dhe, nga e qeshura, duhej mbaje
barkun me dorë. Mirëpo Iloja e kujtoi Lonin e shkretë, piu gotën me fund për
kujtimin e tij dhe me fund e piva edhe unë gotën time. Atëherë teto Dabucka na
i mbushi gotat sërish rrafsh me raki, mërmëriti “ditëziu Loni u bë për të harruar”
dhe, papritur dhe pa iu dredhur qerpiku e as qimet e rralla mbi buzë, lëshoi
shishen me raki mbi tavolinë e tha tërë qejf:
“Dabucka
nuk është kurnace. Pini sa të doni, por mos u dehni. Bëni durim; kam vënë saçin
për të pjekur lakrorin dhe katër kuleçë”
dhe solli një shuk të ngjeshur me djathë dhije, e preu djathin në riska
si kutitë e shkrepses dhe shkoi mbrapa shtëpisë, ku ishte furra dhe vatra ku
ajo kishte vënë saçin për t’u nxehur. Unë dhe Iloja bëmë pazarin që të meremtoheshin
të dyja çatitë e shtëpive: të teto Dabuckës dhe timen. Mirëpo Ilos nuk i
kujtohej kur i pati meremetuar për të fundit herë çatitë dhe pyeti me zë të lartë
teto Dabuckën:
“Dabuckë,
ç’vit ishte kur rregullova çatinë e shtëpisë tënde?”
“Viti nuk
më kujtohet por, e mbaj mend fare mirë: ishte dita kur Enveri e drodhi këmbën” erdhi
zëri i teto Dabuckës që mbrapa shtëpisë.
-He-he-he
– qeshi usta Iloja, por teto Dabucka e dëgjoi të qeshurën e tij hidhnake,
nxorri kokën pas qoshe të murit, fshiu djersët e fytyrës me fundin e përparëses
dhe “ishte ajo ditë kur e flake kapelen nga gëzimi dhe kapelja u rrotullua e ra
në llogjet me presh, në oborrin e shtrigës Grifshë.”
Teto
Dabucka u fsheh sërish pas qoshes të murit.
“Mjaftojnë
njëzet e pesë kokë dhi” – pyeta usta Ilon.
“Mjaftojnë
njëzet” – tha Iloja.
“Qoftë e
bërë” – i thashë dhe lëshova mbi tavolinë kartmonedhat jo për njëzet kokë dhi,
por për njezet e pesë. Iloja i palosi paratë dhe i futi në xhep pa i numëruar.
“Porosite
teton tënde mos më rijë si shqiponjë mbi kokë kur unë të punoj” – tha Iloja.
“Do ta
porosit.”
Çukitëm
gotat.
“Domethënë,
e vendose të ikësh” pyeti Iloja dhe i dha lart strehës së kapeles. Pashë ballin
e ngushtë e plot me rrudha.
“Si të gjithë
edhe unë” thashë
“Atëherë,
ta bëftë mbarë perëndia.”
“Mbarë paç
edhe ti, usta Ilo.”
Iloja u përkul
mbi tavolinë, më pa drejt në sy dhe më pyeti papritur:
“Po
sikur, Marjana e Lonit, të mos shkojë tek e bija në Itali?”
“Ku të shkon
mendja o, Ilo,” gati sa nuk i thirra, por gjuha m’u lidh dhe s’nxorra një fjalë.
Iloja e shkuli kapelen dhe kroi kokën. E shkundi kapelen mbi gju, më pa drejt në
sy dhe qeshi “he-he-he”, me të qeshurën e tij karakteristike, por që asaj herë mu
bë se nuk qe tallëse, por si psherëtimë pylli.
“Më dëgjo
– tha Iloja me zë të ulët e seroiz. Ndezi cigaren, lëshoi shtëllunga tymi dhe i
largoi ato me pëllëmbë – Më shiko në sy kur unë flas. Unë të njoh që kur u
polle. Edhe dërrasën që i shtuan djepit të Shalëgjatëve, unë ia dhashë gjyshit
tënd. Me tët’atë, ndjestë pastë, kam qenë mik për kokë dhe moshatar. Yt’atë bënte
shaka me mua “Ilo, kur unë të vdes, e di fare mirë se ti do vihesh në siklet për
dërrasa të gjata kur të bësh arkivolin tim.” I kemi ndihur njëri-tjetrit në kohë
të vështira. Unë e di kush janë Shalëgjatët dhe më vjen keq që nga fisi i tyre
sot je gjallë vetëm ti. Më shiko në sy – përsëriti Iloja dhe ma tundi gishtin
para hundës – Ti nuk ke bërë ndonjë faj që të ulësh kokën – dhe unë e ngrita
kokën dhe pashë Ilon drejt në sy e me guxim. Iloja kishte sy të vegjël, si dy
kokra kullumbri mbuluar me cipën e pushit të vjeshtës. I hollë si stekë ahishte,
por unë e dija se nën rrobat e ngallosura me llaç, tallash dhe pluhura, fshihej
trupi i tij muskuloz. Pavarësisht se im atë kishte vdekur qëkur dhe Iloja ishte
moshatar me të, për usta Ilon ishte akoma shpejt ta quaje të plakur. E kisha
parë të ngjitej shkallëve si djalosh; në njërën dorë veglat dhe në tjetrën
ndonjë plloçë a, dhogë, për të zëvëndësuar të thyerat nëpër çatirat e fshatit.
“Mjaft u
copëtove për të tjerët – i thëriste e shoqja, Lefka – Do ti apo nuk do, ky
fshat do të bëhet gërmadhë. Asnjëri nga të ikurit s’ka për t’u kthyer këtu, majë
malit. Për punën që bën, nuk ta di njeri dhe s’ke për të marë asnjë kacidhe dhe
as një faleminderit prej harramsëzëve. E mjera unë, ç’më gjeti me këtë burrë kokëshkretë.”
Kurse
mua, ditën që i ndamë nënesë të dyzetat, më tha:
“Unë,
Lefka e Lonit, do t’i lutem zotit që ty të ta ndrojë mendjen. Perëndia të dha më
shumë se ç’ i kërkoj” dhe Lefka e Lonit shtriu krahun nga shtëpia e Marjanës. Rrëmbeu
me vrull kovën e mbushur me ujë, llapashiti këmbët e zbathura në pellgashet
para postafit të çesmës me Tre Sylynjarë dhe iku nxitimthi për në shtëpinë e
saj. Pa kapërcyer ende pragun e portës, ajo u kthye nga unë, hoqi shaminë nga
koka dhe shpupurisi flokët si e shkryer me të dyja duart.
Fshatin e
përshkoi klithma e saj vajtuese:
“Po ike
ti, kush do të na varrosë neve, një grusht pleq, o i Fundmi i Shalëgjatëve?”
Akoma
kisha në kokë kumbimin e zërit të Lefkës dhe asaj herë u hutova dhe nuk e çukita
gotën me gotën e Ilos. Rrëkëlleva të gjithë rakinë e gotës në gurmaz, por edhe
usta Iloja bëri të njëjtën gjë. Kapërdiu rakinë, surbiti dy a tri gllënjka me
kafe dhe “se ç’bëre ti me Marjanën dhjetë vjet me rradhë – më përmendi zëri i
tij – unë dhe Lefka nuk të jemi zemëruar kurrë – Ndezi cigaren me zjarrin e së parës
dhe mbështeti brylat mbi tavolinë. Tha:
“Do të flasim
si burri-burrit” dhe vetullat më mbetën të ngrehura kur dëgjova se Iloja i Lefkës
e paskej parë Marjanën e Lonit që natën e parë të dhjetë viteve të shkuara, kur
ajo u përvodh nga shtëpia, përmes shiut, pa ombrellë e as mushama. Atë natë binte
shi e gjëmonte. Unë dëgjoja lajmet në radion Iliria, radio me bateri, por
lajmet gërvishteshin e ndërpriteshin nga shkreptimat. Më qe kujtuar Paganini. “Ah,
Paganin, lum si ti. Mua, të ziun, m’i ka lidhur këmbët nëneja e sëmurë se do të
kisha ikur së bashku me ty”. Ndërsa unë përfytyroja Paganinin me kitarën në dorë,
në mes të turmës së rrefugjatëve në oborrin e ambasadës austriake, Iloja i Lefkës,
ndërkohë kishte parë Marjanën që doli nga shtëpia dhe mori përpjetë shtegut që të
çonte në vathën ku unë mbaja natën fufën e dhive. Iloja nuk po shpifte. Ai e
kishte parë Marjanën atë natë me shi e bubullima, natë kur edhe bushtra e Kuqalëve
angullinte duke ndjellur qentë e fshatit. Iloja i kishte parë edhe qentë e mi
kur ata bënë zap qentë e tjerë dhe i hidheshin sipër bushtrës, nën tendën me
llamarina të çesmës me Dy Sylynjarë.
“Sa ç’ klyçitej
Gudua, bushtrës i hidhej Balua. Qentë e tjerë bënin sehir nën rrebeshin e shiut”
tha Iloja dhe fjalët e fundit i shoqëroi me të qeshurën e tij, “he-he-he.” Atë natë
vërtet ndërzehej bushtra e Kuqalëve dhe unë u pata dhënë uratën Gudos e Balos, “bëni
qejf o, trimoshat e mi. Shfryjuni paq. Njëherë në vit u vjen dashuria për juve”
dhe u shtriva mbi shtrojat e fierit. U mbulova me gunën e dhirtë. Zhurmërinte
shiu mbi tendën e çadrës dhe nuk po ia vija më veshin se kur qeveria do t’i lejonte refugjatët të iknin
në Evropë. Llambës me vajguri ja kisha ulur fitilin. Flakëza luhatej si majuce
bari e porsa mbirë, lagur nga vesa e natës. “Ishalla hapet nesër moti” po
mendoja kur, papritur, u shpalos fleta e hyrjes në çadër dhe unë u hutova dhe
ngurosa kur një hije larushe femërore u shfaq para meje.
“Kush je
ti” dhe njëra dorë më shkoi tek bishti i sëpatës, tjetra për të ngritur fitilin
e llambës.
“Marjana
e Lonit.”
Kishte
veshur fustanin me lule, që “e vesh rrallë e për mall” thoshte ajo, por që atë natë
fustani ishte qullur dhe ngjitur pas trupit. Edhe flokët e gjatë, të kafejta,
ngjitura pas kokës. Zbathur. Marjana e Lonit kishte pulpë e këllqe të plota dhe
vithet e ngrehura. Gruaja më e bukur e fshatit kishte hyrë në çadrën time dhe qëndronte
para meje me krahët e kryqëzuara para gjoksit.
Pëllëmba
e majtë ngjeshur mbi gjirin e djathtë, e djathta mbi gjirin e majtë.
“Ç’ka
ndodhur” – mezi munda t’i them dhe në mendje më shkoi se do të kishte vdekur
Loni.
“Kam frikë”
– tha ajo.
“Nga kush
ke frikë?”
“Nuk e
di, por kam frikë.”
“Ke frikë
nga Loni?”
“Po” – tha
ajo.
“Vdiq?
“Jo – tha
Marjana zëdredhur – Loni nuk ka vdekur. Është njëlloj si më parë. Sytë i mban të
hapura dhe unë kam frikë të qëndroj natën në shtëpi.”
Me droje
dhe sytë përtokë, duke u dridhur nga frika a, nga e ftohta, ajo u çapit drejt
shtratit dhe më bëri shenjë të ngrija gunën që të hynte nën të. As unë nuk e
mora vesh si ngrita gjysmën e gunës dhe krahu më mbeti i tezarur gjersa Marjana
shkuli nga trupi fustanin e lagur. Nuk kishte këmishë nate, as mbathje dhe as
sytjena. Mua m’u mbërrthyen sytë në qendër të trupit të saj. “Marjana rruan me
brisk edhe qimen më të vogël në trupin e saj te bardhë dëborë” thoshin për të që
kur erdhi nuse në fshat. Gjunjët të rrumbullt, si shugje dëbore. I mbështeti
ato mbi shtrojën e fierit dhe trupi i saj shkau nën krahun tim. Kjo ishte hera
e parë në jetën time kur një trup femre më ngjitej pas trupit dhe ai trup ishte
lakuriq, por i nxehtë si furrë.
“He-he-he
– më përmendi e qeshura e usta Ilos – Shkrepëtiu dynjaja e tërë dhe unë e pashë
Marjanën kur hyri në çadrën tënde. Më ardhi keq për tim’kushëri, Lonin, por
thashë “e shkreta Marjanë. Ka tre vjet që lan e shpëlan Lonin. Marjana është e
re dhe s’ka përse të taposet. Por unë, o I Fundmi i Shalëgatëve, kisha hall
tjetër...”
“Çfarë halli
kishe,” thashë kokëulur, i zënë në faj.
Iloja u
ngrit nga karrigja, shkoi tek qoshja e murit dhe, kur u bind se teto Dabucka
ishte akoma tek furra ku piqeshin kuleçët, ngjeshi kapelen në kokë, qeshi he-he-he
për të më hequr mua hutimin dhe tha:
“Kisha
hallin e Marjanës mos mbetej me barrë”
“Ahaaa – gati
sa nuk thirra – Po qe se Marjana pillte, unë do të isha martuar me të.”
Iloja çukiti
gotën me timen dhe duke vështruar mbi çatitë e fshatit tha:
“Këto që më
the mua, nuk do t’ ia thuash tjetër njeriu.”
Erdhi
teto Dabucka dhe i ngjiti shkallinat duke u lëkundur në të dyja anët. Lëshoi
tepsinë mbi tavolinë, preu lakrorin në ngastra, “hani sa të zhdëpi” tha me zë gazmor
dhe shkoi të mbushte shishen sërish me raki.