Çerkin Bytyçi: Ansambli ''Emin Duraku'' nga Zhuri qëndron në Gjermani

Nga një program i artistëve të Zhurit

 

Nga data 16 deri më 23 prill

 

ANSAMBLI ”EMIN DURAKU” NGA ZHURI QËNDRON NË GJERMANI

 

Nga Çerkin Bytyçi

 

Kjo turne organizohet nën patronatin e Ambasadës së Republikës së Kosovës në Berlin, në vazhdën e kremtimit të 60-vjetorit të themelimit të këtij ansambli të mirënjohur të valleve dhe këngëve dhe me qëllim që mërgimtarëve tanë dhe publikut gjerman, t`iu mundësohet prezantimi i vlerave të mirëfillta nga tradita kulturore e Kosovës.

 

Ansambli “Emin Duraku” nga Zhuri, gëzon epitetin e njërit nga ansamblet më aktive dhe më të suksesshme në Kosovë, ndaj me plotë arsye, mirëpritet kudo dhe kahdo që prezantohet. Në turnen në Gjermani, ky ansambël, arrin me një program solid, karakteristik përkah përmbajtja, me valle dhe këngë që ndiqen me ëndje dhe impresionojnë, e që publiku i këtushëm, rrallëherë ka rastin ti ndjek nga afër. Akoma janë të freskëta kujtimet e artdashësve nga koncertet e shumta që artistët nga Zhuri, në Gjermani, i shfaqën në vitin 2004, kur poashtu, në turnen e organizuar, u prezantuan dhjetra paraqitje mbresëlënëse. Kështu do të jet edhe kësaj here, mbase, zhurjanët, për këtë vizitë janë përgatitur një kohë të gjatë. Qëllimi është që mërgimtarëve tanë dhe publikut gjerman, ti mundësohet ndjekja

Emblema e Ansamblit “Emin Duraku” të Zhurit

nga afër e  vlerave të mirëfillta kulturore, para së gjithash folklorike nga Kosova,  që përshkohen nga veshjet karakteristike autoktone, ritmet e muzikës tradicionale, vallet dhe këngët që shquhen me melosin që kultivohet me përkushtim.

Një nismë e tillë e prezantimit të kulturës sonë para publikut jashtë Atdheut, gjithësesi se është për tu lavdëruar dhe se me këtë organizim, Ambasada e Republikës së Kosovës në Berlin, po bën një punë si shembull që meriton kujdes. Kjo turne, e mbështetur materialisht nga Ministria e Kulturës e Kosovës dhe Kuvendi Komunal i Prizrenit, është në funksion të paraqitjes së organizuar jashtë Atdheut  të thesarit të pasur të folklorit shqiptar me kolorit të shquar, përmes ansambleve serioze dhe të angazhuara tradicionalisht, si është  kjo vatër kulturore dhe artistike nga Zhuri. Sukseset e amatorëve zhurjanë, që vitin e shkuar kremtuan 60-vjetorin e themelimit të shoqërisë së tyre, janë të mëdha kurse pjesëmarrjet e këtij ansambli dhe sukseset në të gjitha manifestimet kulturore në trevat shqiptare, janë dëshmi e një organizimi të mirëfilltë që synon profesionalizimin e merituar kaherë.

Turnenë e tyre në Gjermani, zhurjanet të cilët i janë mirënjohës Ambasadës së Gjermanisë në Prishtinë që iu mundësoi qëndrimin në këtë vend mik të shqiptarëve, do ta fillojnë me koncertin që do të shfaqet më 16 prill në Singen, për të vazhduar pastaj edhe në disa qytete tjera si në Ludwigsburg, Düsseldorf, Berlin etj. Kështu, me programet e veta, ky ansambël, do të sjell freski në jetën kulturore dhe përditshmërinë e diasporës shqiptare, e cila, kaherë nuk ka shijuar vlerat e mirëfillta të thesarit të pasur folklorik të  trevave tona.

 

 

 

Anëtarët e Ansamblit nga Zhuri nga një vizitë në Shqipëri, me presidentin Bamir Topi