Skënder R. Hoxha: Pranverë e ftohtë në Shqiponjë

Skënder R. HOXHA:

NË VEND TË PËRKUJTIMIT

PRANVERË E FTOHTË NË  SHQIPONJË

/Kushtuar bashkëfshatarit tim, mësuesit Gani Brahimaj, i vrarë nga forcat serbe gjatë luftës së Kosovës. Eshtrat e tij i rivarrosëm, një ditë maji 2005, në vendlindejn e tij, në Shqiponjë (ish-Jabllanicë e Dushkajës./

Pas gjashtë pranverash

Të mbytura në pritje

Që mezi rrëshqitën në kalendar

Sot prapë pranverë e ftohtë

Në Shqiponjë m’i shpalon

Plagët e njoma të atdheut

Rivarrosëm mësuesin Gani

Nën hijet plaka të bungjeve

Të Zabelit të Gojanit

Praën të rënëve në altar

Në stacionin e të pavdekshëmve

Në Gjakovën e përgjakur

Të rrëmbyen hienat e shkinisë

Kur në Kosovë

S’kishte kuptim nata as dita

Kur grykat e luginat

Ishin të zëna me prita

Aty mbeti

E ngrirë fundëndrra

A shembet ndonjë vetull

E Rrahit të Hysës sot

Kur mungon grigja

Kur nuk gjëmojnë më

Telat n’violinë t’Ganisë

Sot karvani mortor

Përthekon krejt katundin tim

Mbrëmja tjerr testamentin

Sa vonë ngroh Dielli Ynë…

/Shqiponjë, maj 2005/