Kulturë
Adem Zaplluzha: Miqtë e mi të kërrusur
E merkure, 22.07.2015, 06:39 PM
Nga manifestimi “Drini poetik”- Prizren, 2015
Adem Zaplluzha
Pesë poezi nga libri “Një shi prej bryme”
MIQTË E MI TË KËRRUSUR
I paskam harruar emrat e lagjeve
Ose këto ngjyra të luleve
Po ngjajnë
Me ngjyrën e kuq të dheut
Diçka nuk është në rregull
Me sytë e mi të gështenjtë
Nuk po i shoh gjërat ashtu
Siç i pata lënë dikur
Kjo urë që e ndanë qytetin
Në dy pjesë po qan si era
Pamjen e saj arkaike
E nuk paska ndryshuar
Kurse në anën tjetër
Akoma mund kalohet
Duke shkelur mbi shpirtin e saj
As njerëzit më s’janë ata
Që i njihja dikur
Qenkan plakur si bastunët e tyre
Ecin rrugëve të kalldrëmta
Dhe trokëllinë nëpër gurë
Si galopet e kuajve të dikurshëm
Miqtë e mi të kërrusur
Ecin me nga një shami në dorë
Duke i fshirë sklepat
Dhe kohë pas kohe
Dorën e djathtë e çojnë deri te hundët
Nuk janë në gjendje të mirë shëndetësore
Kolliten si kuajt e sëmurë
Dikur që i kapnin yjet me dorë
Sot nuk janë në gjendje
Me i ndalë as gogësimat
KUR NA VININ FESTAT
Ende nuk i kam humbur rrugët
Do të kaloj këndej
Kah kemi kaluar të mbledhim dredhëza
Dhe t’i ndjekim pulat e egra
Ishin kohërat kur na mungonte ushqimi
Një kaçik pule vlente sa një deve
Në sofrën e uritur
Rrapëllonin lugët
Pas supës së ftohtë me hithra
Më kujtohet kur nëna na mashtronte
Duke i zier lëvoret e ahut
Buka ishte një ëndërr
E parealizueshme për ne
E shihnim vetëm nëpër dyqanet e pasanikëve
Këpucët tona ngjanin me lëkurën
E këmbëve të breshkës
Kur na vinin festat fetare i arnonim
Dhe i lustronim me dhjamë buallice
NJË TELEPATI E METALTË
Mbase celularit ja paske zënë frymën
Sa herë që cingëroj
Asnjë njeri nuk lajmërohet
Andej atij muri të shurdhtë
Mua më befason shumë kjo heshtje
Edhe celulari ngjan me ty
Jeni të njëjtë ti njeriu prej mishi
Kurse ai një copë plastike pa vesh
Nuk di më se kujt t’i drejtohem
Andej mendjes muri i akullt
Brenda në shpirtin e celularit
Një sustë e zezë nuk bëzan
Një telepati e metaltë lëshon rrënjë
Në shpirtin njerëzor
Hesht kur ka e s’ka nevojë
Dhe nganjëherë cingëron si ndërgjegjja
TË LUTEM DORA IME
Natën e mirë dora ime
Mos ma kruaj sonte shpinën
Druaj se do e lëndosh mendjen e lëkurës
Po bie nga pakë një shi i verdhë
Po bie mbi syprinën e kalldrëmeve
Nuset kanë dalë te kroi dhe po i krehin flokët
Janë sëmurë shtambat prej argjile
Nuk marrin frymë
Ngjajnë me njeriun që vuan nga etja
Syri im i djathtë nuk e sheh syrin e majtë
Të lutem dora ime
Mos m’i kruaj sonte kujtimet
DUKE U NGJITUR MAJAVE
Duart e tua arabeska fjalësh
Të zbrazëta
Si tingujt e një muzike të shthurur
Mëngjeseve herët zgjohen
Dhe nëpër muranat e faltoreve pagane
I lexojnë epitafet e së kaluarës
Nëpër rrëfyestore bie shi lotësh
Pendohen drurët
Me një fjalë goje lahen mëkatet e kaluara
Dhe ato që do pasojnë më vonë
Nga biri i birit të njeriut
Nëpër kishat e qytetit të vjetër
Kanë heshtur kambanat
Asnjë zë njeriu nuk dëgjohet
Rrugicave qorre
Vetëm një zog i vetmuar
Fluturon vërdallë
Fluturon deri në theqafje
Duke u ngjitur majave
Nëpër mëkatin
E papërmirësueshëm të njeriut