Albert Habazaj: Mësuesi – misionar dritë

Tërbaç, 20.03.2004, A. Habazaj me mësuesit R. Abazi, K. Mici, Z. Hoxha

MËSUESI - MISIONAR DRITE

ALBERT HABAZAJ

“Vlera e mësuesit dhe pesha e qiellit nuk maten kurrë” (Konfuci)

Kur nxënës ne kemi qenë

Mësuesi quhej prind i dytë,

Dinjiteti i tyre kishte vlerë,

Si mësuesit s’kishte të dytë.

Ata qenë të mençur shumë,

Qenë si male hyjnorë,

Ata qenë diell në furtunë,

Një nga një u bën’ meteorë.

Mësuesit më ikën një nga një,

Fisnikët e mi të lartë,

I kam, dhe pse s’ua dëgjoj atë zë,

Në frymëmarrjen time dit’ e natë.

Ku t’i gjej t’u puth fjalën

Siç puth Dheun e Flamurin,

Si bregu i detit pret valën

Pres urtësinë e tyre të Burrit.

Mrekulli mund të ndodhë vërtet

Të bëhem sa një e mijta e tyre,

Ata erdhën e ikën profetë,

Dhe zbukurojnë qiellin me yje.

Nderim mësuesve të mi

Më të mirëve në botë,

Baras qenë me Perëndi,

Diell që thyen çdo shqotë.