Aleks Kapllaj: Forumi "Ura Ekonomike" i mbajtur në Romë ishte takimi i suksesit të sipërmarrësëve shqiptarë!

Forumi "Ura Ekonomike" i mbajtur në Romë ishte takimi i suksesit të sipërmarrësëve shqiptarë!

Nga Aleks Kapllaj

Pak ditë më parë u mbajt në Romë, Forumi Ekonomik ndërkombëtar shqiptar "Ura Ekonomike", i organizuar nga RIDA (RRSDSH Rrjeti i Sipërmarrjes së Diasporës Shqiptare) në Itali.

Sipërmarrës nga Shqipëria, Kosova, Maqedonia e Veriut, Lugina e Preshevës, rajonet e Italisë dhe nga shumë vende të Evropës kudo ku jetojnë dhe e kanë aktivitetin e tyre sipërmarrësit shqiptar ishin prezent në këtë event të rëndësishëm.

Gjithashtu morën pjesë në këtë Forum të gjitha degët e Rrjetit Global të Biznesit Shqiptar (Albanian Global Diaspora Business Network), që nga Australia e deri në Mbretërinë e Bashkuar, nga Turqia deri në Finlandë, nga Greqia në Norvegji, nga Gjermania, Zvicra, Belgjika, Franca e shumë vende të tjera evropiane.

Përshendetën forumin përfaqësues të istitucioneve italiane e shqiptare e kosovare ku na nderoi me pjesmarrjen e saj edhe ambasadorja e Kosovës në Romë shkelqësia e saj Dr. Nita Shala.

Punimet e Forumit u hapën nga Presidenti i RIDA-s Dr. Vat Marashi i cili përshëndeti të gjithë pjesëmarrësit dhe u bëri thirrje të shprehin forcën e tyre me krijimin e rrjeteve të reja të bashkëpunimit me sipërmarrës të ri me qëllimin kontributin dhe zhvillimin ekonomik të bisneseve të tyre, por edhe të vendit tonë të origjinës ashtu edhe të vendit ku jetojmë e punojmë me dekada e që është shndërruar vendi ynë i dytë.

Përshëndeti gjithashtu Forumin "Ura Ekonomike" të Romës edhe presidenti i Rrjetit të Sipërmarrësve të Diasporës Shqiptare në botë (Albanian Global Diaspora Business Network) z. Omer Nura. Njëkohësisht përshendetën Forumin edhe presidentët e degëve të sipërmarrësëve shqiptarë të vendeve të tjera evropiane.

Suksesi i Forumit ishte mesazhi i bashkëpunimit dhe vullneti i të gjithë sipërmarrësëve për të gjetur forma, strategji dhe projekte të përbashkëta për të rritur bizneset dhe për gjetur partneritete dhe mundësi të reja.

Në sesionin e Forumit dedikuar B2B (Business to Business) shumë sipërmarrës shqiptarë të ardhur nga trevat shqiptare, nga të gjitha rajonet italiane edhe ato të arbëreshëve dhe nga vendet evropiane ku ekzistojnë degët e Sipërmarrjes shqiptare ( Albanian Global Diaspora Business Network) u krijuan kontakte dhe lidhje të reja për të punuar së bashku në të ardhmen me qëllim rritjen e bisneseve të tyre.

Grupet Musta dhe Pilavi, me aktivitete kombëtare dhe ndërkombëtare, prezantuan sukseset e tyre me vizione të qëndrueshme dhe kapacitete rritjeje të vazhdueshme të gatshme të bashkëpunojnë me kompanitë e tjera italo-shqiptare dhe ato ndërkombëtare kudo që ata zhvillojnë aktivitetin, duke treguar se suksesi është objektiv realist kur pikërisht rruga për t'a arritur atë është pjesë e tij.

Nga pothuajse 50 000 sipërmarrës shqiptarë që janë në Itali, që e zhvillojnë aktivitetin e tyre me sukses ka nga ata histori suksesi që ikën nga Shqipëria me gomone dhe sot faturojnë deri në 300 milionë euro.