Sevdail Hyseni: Cirku parlamentar

Sevdail Hyseni

Satirike

Cirku parlamentar

A ka më komik se parlamenti pa kryetar,

Që ka për flamur, një bojkot legjendar?

Populli votoi, me shpresë dhe me durim,

E tani e ndjek telenovelën me shqetësim!

Në sallën e kuqe, ligji përmendet me nder,

U mblodhën sërish për njëzet e pesë herë.

Deputetët që nuk dinë ç'kanë nënshkruar,

Seancë pas seance – një cirk i programuar.

Komisioni formohet, për votim të fshehtë,

Por, që mbetet bosh, si valixhja e shkretë.

Ndërsa qytetari pret, me shpresën e kotë,

Të zgjedhurit e popullit pushojnë n’resort.

Kur ua përmend votat, si vullnet e mision,

Ata zgërdhihen ashiqare, a je ti në iluzion?

E dinë se bllokada, nuk sjell ndonjë befasi,

Rroga vjen me kohë, kjo është me rëndësi.

Prapë thirret Kuvendi s’dihet kur mbaron,

Njëri voton, tjetri ikën e ndonjëri mungon.

S’ka kuorum, e seancës i vije si pulës veja,

Mirupafshim, o popull, në zgjedhjet e reja!