Ing. Meme Ribaj Habazaj, Artistja e Popullit, Nderi i Kombit Margarita Xhepa dhe Albert Habazaj; Vlorë, e mërkurë, 28.12.2011

LOT PRILLI PËR MARGARITËN

Nga Albert HABAZAJ

Ti, që më 2 prill na erdhe

Ti, që më 3 prill na ike,

Më trishtove, keq ma zverdhe

Një këngë të bukur lirike.

Të thura këngë me refren

Tok me Shqiponjat e këngës

Se vjersha për Ramizenë[1]

Të preku telat e zemrës.

Dhe si divë, zëdrithëruese

E këndove shpirtlënduar,

Në përmasa rrezatuese

Ramizenë yllzbukuruar.

Po sa herë ne biseduam

Ti me at’ zë si mjaltë i mallit,

S'mund ta fshij dot, jo, nuk dua

Numrin tënd të celularit...

Prilli i bukurisë tënde

Si Zonjë e Madhe, ikonë

Si Margaritar në mendje

Më vjen, po aq vesë e njomë...

Ti dje festove datëlindjen

“Nderi i kombit”, po thjesht fare,

Sot më shkasin lotët, s'binden

Për ty, Pishë e Bardhë krenare.

Lot me lule prilli janë

Që më dhembin, sa një plagë,

Rolet vijnë, më ulen pranë

I kam për shpirtin mëllagë.

Ti, që loze Ofelinë

Shpirtëmira engjëllore,

Je një tufë me trëndelinë

Qesh si rreze diellore...