Sevdail Hyseni: Festat e dyfishta

Sevdail Hyseni

Festat e dyfishta

Satirike

Mësuesi - hero i heshtur

Dita e Mësuesit, me urime plot,

Lule, përqafime, fjalë me lot.

Po mbaron festa, nis realiteti,

Paga s’mjafton për letra tualeti!

Shkon në klasë, pa nxënës te dera,

Bankat boshatisur, fjalët i merr era.

-Ku janë nxënësit?-pyet me kërshëri:

-Në Francë, Gjermani, Itali, Angli!..

Drejtori psherëtin, tund kokën në hall:

– Shkollat po shuhen, o mësuesi ideal.

Po, vitin tjetër nuk dihet, në protestë,

A do të kemi shkolla të mbajmë festë?

Në fund të ditës, me lule në dorë,

Mësuesi del i heshtur, në korridor.

Dikush me ironi i thotë një fjalë:

– A t’i marrim valixhet dalëngadalë?!

Po, ku të shkojmë? Nuk ka kuptim,

– Jo, te shtëpia, nesër kemi mësim.

Sa të ketë nxënës, sa të ketë dritë,

Deri sa shkollat të mbyllen një ditë!

Festa e grave

Se gratë, sot janë, qendër universi,

Me lule, dhurata e me fjalë interesi.

Me statuse pompoze në çdo ekran,

Me premtime bosh, e fjalët pa plan!

Në zyrë shefi me stil, flet i gëzuar:

-Gratë meritojnë, vend të nderuar!

U fal nga një çokollatë me lule-buqetë,

E, ngritja e rrogës s’është për moment!

Në parlament, shumë herë e pohon,

Me fjalë të mëdha, gratë lumturon.

Ndërsa në praktikë, prapë e mohon,

Një të drejtë, që vetëm n’letër jeton!

Në shtëpi, burrat s’janë sipas zamani,

Një filxhan vetë e çojnë te lavamani,

Një fshesë marrin, pa u bërë syri vër,

Dhe presin medalje për punën e bërë!

Oh, gra të dashura, sot gëzohuni fort,

Është dita Juaj, me pavarësi të plotë.

E, nesër kësmet, ktheheni në “paqe”,

Te burrat, që i keni sa për sy e faqe!

(Karikaturat marrë nga interneti)