Kolec Traboini: Shoku ynë i klasës Paulin Selimi

SHOKU YNË I KLASËS PAULIN PALI (SELIMI)

Nga Kolec P. Traboini

Kemi qenë në një klasë në shkollë fillore në Shkodër me Paulinin (1947-2013). Në po atë klasë ishte dhe Primo Shllaku. Pra tre shokë të një klase u morëm me letërsi. Padyshim Paulini, shoku ynë i klasës, fitoi shumë shpejt emër në publik në fushën e humorit skenik. Por jam çudit kur aty nga viti 1971 kur isha student , ai  doli në shkrime me emrin Paulin Selimi, sepse në shkollë ai njihej si  Paulin Pali. Ndoshta ndonjë këshillë nga ata që e dinin se Paulin Pali ishte një emër që i iritonte kuadrot e Partisë e pushtetit të asaj kohe, të cilët, intelektualin e njohur Paulin Pali e kishin ekzekutuar pa mëshirë kur kishin marrë pushtetin. Por mbiemri Pali tingllonte armiqësor për pushtetin monist edhe për faktin se edhe mësuesin Pjetër Pali, nga Hoti,  e kishin ekzekutuar në Shkodër, Terezina Palin, e shoqja e poetit Zef Zorba, ishte  burgosur gjithashtu. Zef  Pali, gazetar e shkrimtar ishte një veprimtar antikomunist i njohur  në Romë.. E kam provuar edhe vetë sa herë me mbiemrin Traboini, sepse një Mark Traboini ishte dënuar me vdekje në mungesë e plot peripeci të tjera me këtë mbiemer sa dhe mua më sugjeruan mbiemer tjeter, ta zëmë në revistë Hosteni një satirë kritike ma botuan me emrin Kol Tini. Ishte kohë apokaliptike. Të detyronte të tjetërsoheshe që të arrije të mbijetoje.

Paulin Pali (Selimi), me profesion mësues,  ishte i talentuar dhe falë talentit e këmbëngulljes fitoi një popullaritet të meritueshëm. Edhe sot të sjellin humor e gaz skeçet dhe shkrimet e tij botuar në shumë libra.

Po e shoqëroj këtë shenim me një foto nga fëminia e shokut tonë të klasës Paulin Pali (Selimi).

I paharruar!