Kastriot Dervishi: “Epopeja” në Sul të Devollit

“Epopeja” në Sul të Devollit

Nga Kastriot Dervishi

Lufta “heroike” kundër shqiptarëve jokomunistë të cilësuar “reaksionarë”, parashikonte vrasjen e tyre, marrjen e pasurisë dhe mobilizimin me forcë si partizanë. Letra e mëposhtme e tregon fare qartë që vetëm me pushtuesin nuk kishin punë:

“Më datën 27.3.1944 vendosëm të sulmojmë Sulin, bazë e reaksionarëve që i përngjet Bozhigradit. Për ta kapur armikun në befasi, vendosëm ta bëjmë sulmin me 2 orë ditë, duke ditur se armiku do të tentonte të futej prapë brenda dhe të kishin gjithë natën përpara. Rrethimi u krye edhe nga ana e Koshnnicës, por prapë ngjau avazi i zakonshëm. Ballistët u mbyllën brenda dhe që andej nuk qe e mundur t’i shkulnim, megjithëse u bënë tre sulme të rrepta. U luftua tërë natën deri në mëngjes dhe pastaj u hoqën për në Ziçisht-Gjyrës. Në Sul u dogj shtëpia e kryetarit të Këshillit të Ballit dhe në Koshnicë shtëpia e Qamil Koshnicës (komandant Balli në Devoll) dhe e një reaksionari tjetër...

Objektivat që kishim caktuar neve, nuk i kemi arritur dhe nuk paraqiten shpresa që t’i arrijmë. Cilat qenë këto objektiva? Të bënim një spastrim të pjesshëm të reaksionit (një spastrim radikal në krahinën e Devollit, si mund të nënkuptohet lehtë, është e pamundur sot për sot) dhe të mobilizonim të paktën 200-300 veta. Dy nga bazat kryesore të Ballit në Devoll janë Bozhigradi dhe Suli. Dy-tri tentativa që kemi bërë na kanë dhënë të kuptojmë se këto baza se s’mund t’i marrim. Balli ka mësuar tani të përdorë taktikën e të mbyllurit brenda në shtëpi, të cilat mbrojnë njëra-tjetrën me zjarr të kryqëzuar”.

(Pjesë nga letra e datës 31 mars 1944, e komandantit të Brigadës së 4-t, për luftën në Sul të Devollit kundër Ballit Kombëtar)