Florim Zeqa: Shtjerrja e “oqeanit” politik!

Shtjerrja e “oqeanit” politik!

Shkruan: Florim Zeqa

Tshmë kur ‘Qeveria Kurti’ po hynë në vitin e fundit të mandatit kushtetues në qeverisjen e vendit, partitë politike i kanë ndezur “motorët” për shtrirjen sa më të gjërë politike në elektoratin e tyre në Kosovë dhe Diasporë!

Gjahu i madh i partive politike në Diasporë

Në kohën kur kemi rënje enorme të numrit të popullatës në Kosovë, partitë politike ju kanë kthyer mërgatës sonë, e cila gjithnjë e më shumë po bie pre e gjahut të politikanëve mashtrues!

Të gjitha partitë pa dallim, në pushtet dhe opozitë kanë pësuar rënje në elektorat shkaku i dështimeve në mbajtjen e premtimeve ndaj qytetarëve.

Liberalizimi i vizave e ka bërë tejët sfiduese fushatën elektorale të partive politike, për shkak të zbrazjes së Kosovës nga qytetarët, votues potencial të zgjedhjeve të radhës.

Andaj, aktiviteti i partive politike më shumë është i përqendruar tek mërgata sesa tek popullata e mbetur në Kosovë.

Nëse ndodh që ‘Qeveria Kurti’ të shkojë deri në fund të mandatit, atëherë do të ishte qeveria e parë në Kosovën e pasluftës e cila do të arrinte të thente rekordin qeverisës në vend, pasi asnjë qeveri deri më tani nuk ka arritur të shkojë deri në fund të mandatit politik!

Shkuarja ose jo deri në fund të mandatit politik e qeverisë aktuale varet nga faktorët ndërkombëtar dhe atë për shkak të mospërmbushjes së obligimeve ndërkombëtare apo të moszbatimit të marrëveshjeve politike për Asociacionin e Komunave Serbe në Veri të vendit.

Pra, ‘Qeveria Kurti’ në asnjë rrethanë nuk do të bie për shkak të opozitës dhe as të përgjegjësisë morale për mospërmbushjen e premtimeve elektorale ndaj qytetarëve!

Liberalizimi i vizave nën masa ndëshkuese, liberalizim me bisht

Liberalizimi i vizave nuk është produkt i kësaj qeverie, por është rezultat i avancimit të diplomacisë serbe tek faktorët ndërkombëtar për zbrazjen e Kosovës nga popullata shqiptare.

Dikujt mund t’i duket paradoksale ky konstatim i imi, por realiteti po e thotë të vërtetën e hidhur!

Mbase, është rasti unikat në shtetet e Ballkanit Perëndimor, kur një shteti nën sanksione ndërkombëtare i mundësohet liberalizimi i vizave!

Thënë ndryshe, liberalizimi i vizave nën masa ndëshkimore nga bashkësia ndërkombëtare është liberalizim me bisht për Kosovën.

Pse është kështu?!

Sepse, Serbia përmes zbrazjes së Kosovës në heshtje po e zvogëlon forcën mbrojtëse dhe prosperuese të Kosovës, por e zvogëlon forcën rinore, gjakun e pastër e të njomë kombëtar i cili po kthehet në fuqi krahu për shtetet evro-perëndimore.

Lë anash moshat e vjetra të cilat do të kthehen në Kosovë, të rinjët do t’i shfrytëzojnë të gjitha përparësitë që ju krijon liberalizimi për të realizuar një kontratë pune për të ardhur në Kosovë vetëm sa për të marrë një vizë pune dhe për t’u kthyer sërish në vendet perendimore.

Kjo do të ndikojë në shtjerrjen e “oqeanit” politik dhe zvogëlimin e fuqisë punëtore në Kosovë.

Zgjedhjet pa alternativë të re, përseritje e vazhdimësisë politike

Sikurse nisma Alternativa Demokratike për Ndryshim (ADN), asnjë nismë tjetër politike nuk duhet të jetë vazhdimësi dhe as levë e subjekteve aktuale politike. Ngase secila prej tyre, për të mirë apo për të keq, e kanë dëshmuar vetën në qeverisjen e vendit.

Ardhja në pushtet e një klase krejtësisht të re dhe të përgjegjshme politike, e aftë për ndryshime pozitive, do të krijonte premisat për zhvillim ekonomik dhe mirëqenie për të gjithë qytetarët e Kosovës pa dallime etnike, partiake, ideologjike apo fetare.

Insistimi im i vazhdueshëm për ndryshimet pozitive në vendin tonë, nuk e nënkupton ‘pasurimin’ e skenës politike edhe me një subjekt të ri, por në esencë, është përpjekja ime për finalizimin e projektit madhor për themelimin e një lëvizje të re politike, e cila në gjirin e vet do të tubojë elektoratin e zhgënjyer nga të gjitha partitë politike, sa të dështuara, po aq të konsumuara përgjatë këtyre 25 viteve të fundit në liri.

Nisma e re, Alternativa Demokratike për Ndryshim (AND), nuk e ka thjeshtë vetëm qëllimin për ndërrimin e pushtetit në Kosovë, por ndryshimin e mentalitetit qeverisës dhe ndryshimin rrënjësor të sistemit qeverisës në vend.

Tre shkronjat ADN simbolizojnë gjenezën politike të shqiptarëve në trojet etnike (LDK-në rugoviane), të cilat do ta ndalojnë katandisjen e mëtutjeshme politike të shqiptarëve dhe të shtetit të Kosovës në veçanti.

Florim Zeqa

22.01.2024