Edison Ypi: Pllaqì

Pllaqi

Nga Edison Ypi

Rrugës për në Korçë lokalet janë plot me mendimtarë lokalë, aristotela, platona, konfuca, sokrata, shekspira, frojda, dostojevska. Gjithologët autodidaktë, profesor-doktorat e improvizuar që i kanë shndrruar lokalet në auditorë në natyrë, para tavolinave me kafe, raki, mëlçi, mish, peshk, birrë, salc kosi, bukë të thekur, flasin me zell për fatet e kombit, hallet e popullit, politikën, gjeopolitikën, diplomacinë, intrigat ndërkombëtare, ekonominë, bankat, luftrat, krizat e monedhave, keqsimin e klimës, barazimin e stinëve, fundin e botës.

Rrëzë Qafës së Thanës, panair shurrash.

Fëmijët që lajnë makinat, për të tërhequr vëmendjen e shoferave mbajnë në duar tuba që e hedhin ujin lart; "Porsi malli i trimit që buçet përpjetë".

Duke i mbajtur varur në duar, peshkatarët e Liqerit të ftojnë të blesh ngjala të gjalla që përdridhen si kurva.

Nga Korça drejt Devollit, më të djathtë Plasa dhe Belortaja, më të majtë drejt fushës, një kthesë. Sapo ke hyrë te ajo kthesë, thith tjetër ajër, merr tjetër frymë.

Kreshpanji.

Zoti më ruajt nga nëpunësat, shefat, sekretarët, kryetarët. Kreshpanji, kreshpanjarët, ata më duhen.

Fshati Kreshpanj ka 320 banorë, 68 Shtëpi, 1 traktor për 2 shtëpi, nja 50 autovetura, motoçikleta, dhe biçikleta pa numërim.

-Sa tokë ka Keshpanji ?

-840 hektarë. Marrim dhe 600 hektarë të tjerë me qira nga fshatrat përreth.

-Si ia dilni t'i kultivoni gjithato hektarë ?

-Ka përparuar kapitalizmi këtej nga ne, bre. Kemi 120 krahë pune, 180 të tjerë i marrim me mëditje këtej rrotull.

-Çfarë mbillni e korrni në këto toka ?

-Vetëm pllaqi. 250 ton Pllaqi në vit. Kreshpanji është vendi më i mirë në botë ku bëhet pllaqia më e shijshme, më e madhe, më e bukur, më e pastër, më e shëndetshme. Pllaqia bëhet edhe nëpër fshatrat rrotull. Ama jo si në Kreshpanj. Burra, gra, të rinj, të vjetër, nga 10 në 100 vjeç ne punojnë të gjithë nëpër ara. Nuk kemi ne në fshat kafenera, bilardora, gjëra qefi. Qefi ynë është puna. Pllaqinë tonë vjen e merr greku e mbyll në kanaçe llamarine. Ato pllaqitë që emigrantët shqiptarë në Europë e gjetkë i blejnë nëpër supermarketa, janë pllaqitë tona, pllaqitë e Kreshpanjit. Eksportojmë 1 milionë dollarë pllaqi në vit. Po deshe të dish më tepër për ne dhe pllaqitë tona, pyet aristotelat dhe ajnshtajnat e kafeneve anës udhës. Pllaqitë i prodhojmë ne kreshpanjarët. Spjegimet për pllaqitë i japin profesorët. Ju andej nga Tirana keni të mëdha pordhët e pllaqive tona. Ne këtej nga Kreshpanji kemi të mëdha pllaqitë e pordhëve tuaja. Ta ndërtojmë kapitalizmin me pllaqitë e Korçës dhe pordhët e Tiranës.