Dedë Preqi: Përse kjo urrejtje?

Dedë Preqi

poezi

PËRSE  KJO URREJTJE ?

Çuar peshë kjo urrejtje n’mes nesh

Sa yje  u tretën në këtë rrëbesh,

Shkulet e tkurret kjo rrënja jonë

Nga ky rrëfim pa shije e pa aromë.

Dikush thërret eh, zëshëm e thotë

Afsh e lot derdhën mbi lulen e ngrohtë,

Gjethet ankohen me shpirt të etur

Ringjallet laneti me kokën ndërsjetull.

Kush po i vranë bukuritë e syrit prush

Po dergjen pranverat e vjeshtat pa rrush,

Pse kjo politikë përshesh në nesh

Krimi e korrupsioni lulëzojnë në mes shesh.

Përse e gjithë kjo urrejtje në gjakun tim

Era mëshehtas i tund gjethet e thara,

Syri i lokës a do të terët në përqafim

Si vjeshtë e shterrë pa kallinj në ara…

Ditë e stinë pa brenga do rrëshqasin

Fontanë me harmoni në gjerdan varë,

Ujqërit turpshëm një ditë vetë do pëlcasin

Urrejtja në dashuri të gufoj ndër shqiptarë.

Kahdo që frymon si zgjua shqiptaria

I lidh gjaku e i mbanë gjallë vëllezëria,

Dikush i dashuruar në diell e dikush në hënë

E kanë vetëm një zot, e kanë vetëm një nënë.