Sejdi Berisha: Sa herë atdhe...

P o e z i

 

Sejdi BERISHA:

 

SA HERË ATDHE...

 

(Rrugëtim apo elegji e vargut tim)

 

1.

Sa herë atdhe

Rinia të tha lamtumirë

Dhe larg teje mbetën

Me shkrumbin e lirisë

Me etjen për bukurinë

E me vuajtjet tuaja barrë

 

2.

Sa herë atdhe

Lamtumirë të thanë

Sytë e djemve që i rrite

Sa herë me emër të azilit

U ngujuan nëpër depo

Me emrin e rrejshëm

Qendër azili

Ku edhe aty i rrëfenin

Ëndrrat e tyre rinore

 

3.

Sa herë atdhe

Për Ty gjaku u përcëllua

Pas grilave e bodrumeve

Për ta fituar një copë bukë

 

4.

Sa herë atdhe

Nga malli për Ty

Mërgimtarët u bën poetë

Edhe këngëtarë elegjish

Për t’i kënduar këngët

Me plagë loti

Për ta ledhatuar

Ballin e lodhur Ty atdhe

 

5.

Po pse gjithnjë kështu

O, atdheu im

Nëpër mote e shkuj

Edhe nëpër histori

 

6.

Sa herë atdhe

Të rinjtë e tu

Me zemër të thyer

Nënave

Lamtumirë u kanë thënë

Duke të bartur Ty

Në shpirt e në mendje

 

7.

E tash, atdhe

Pse po tretën të rinjtë

Prapë refren i mallkuar

Prapë prapa grilave

Të shkapërderdhjes së qenies

 

8.

Azil...

Si të shlyhet kjo dhembje

Se gjiri i nënës

Se aroma e tokës

Edhe freskia e ujit

E gjuha e ajrit

Në Ty atdhe

Sertshëm rrisin shtatin

E rrugët janë plotë kujtime

Janë plotë kujtime kujtimesh

 

9.

Sa herë atdhe

Edhe unë kam vendosur

Të të them lamtumirë

Por dot nuk hapej asnjë rrugë

Se Ti atdhe

Pa ne je si nëna që nuk lind

Si ara pa bimë

Si ora pa tik-takun e vetë

 

10.

Sa herë atdhe

Fëmijët t’u janë daktisur

Shih defterin

Nëpër botë shpërndarë

Kudo që zënë rrënjë

Të gjithë për Ty i kanë këto fjalë:

Ti atdhe, shkrumbi im

Dashuria ime që nuk falet

Andaj atdhe

Këtu më ke

 

11.

Këtu...

Edhe nëse më sheh

Me buzë shkrumb

Edhe me sy të ënjtur

Edhe me shikim të tharbur

 

12.

Eh, mori toka ime

Po, histori e gjatë je

Legjendë e trembur

Nga pëllumbat në fluturim

Që histori je

Kurrë e pa ndritur deri në fund

 

13.

Për këtë arsye

Të dua më shumë

Se në Ty brenda e jashtë

Është madhështia e jetës

Që askush tjetër nuk mund ta ketë

 

14.

Qeshu e krenohu atdheu im

Se, tek e fundit

Loti dhe urata ime

Ka për të rritur

Ka për të forcuar

Ashtu siç dua unë

Krejt ashtu siç ke qenë dikur...