Sami Islami: Tafa karrierist

TAFA KARRIERIST

Në rininë e vetë Tafa u shkollu

Në frymën komuniste, mirë u eduku

Dhe kudo që i jepej rasti të shkonte,

Partinë komuniste e propagandonte!

Kjo asht partia ma bashkëkohore

Do ta çojë njerëzimin përpara prore!

Ç’na duhet neve  kombi e shqiptaria ,

Kur për ne kujdeset prijësi e partia!

Baba i tij plak, e vështronte djalin

Që kish’ dalë prej udhës ia kishte hallin

-Mos harro ti biro, kurrë shqiptarinë

Rrugën qe ke marrë do t’çojë veç n’ greminë!

Fenë edhe kombin e mohon vetë partia

Ç’na duhen kanuni,  kisha e xhamia?

Me këto ide Tafa mbeti gjersa u pensionu

Kur ra komunizmi dhe çdo gja u ndërru.

Po tash  s’kish’ ç’të bante, s’ish ma i ri,

Ndërroi mendjen dhe nisi të shkonte në xhami,

Shante komunizmin, sistemin antikombëtar,

N’xhami shkonte i pari dhe ulej në saf  (1) t’parë!

Nisi të bante plis, në dorë mbante tespi (2)

Inatosej  me veten se ç’kishte ba në rini

Në altar po gjente rehati shpirtërore

Ceremonitë e faljes po i shkonin për dore

Tafa tashma në xhami çdo vakt do t’ shkonte,

Sa i përket faljes edhe hoxhës do t’ ia kalonte,

Dhe,   a e dini ç’i tha   imamit një ditë?

Nëse doni  mund t’jua  fali edhe teravitë(3)!

1. Rend në xhami
2. Rruza  në pe që i përdorin fetarët gjatë lutjeve
3. Falje e gjatë në muajin e ramazanit (pas iftarit)

Sami  ISLAMI

Londër , 22.09.2010