Kulturë

Milazim Kadriu: Sakrifica e tyre në periudha të ndryshme në shërbim të atdheut

E shtune, 14.11.2009, 08:01 PM

SAKRIFICA E TYRE NË PERIUDHA TË NDRYSHME HISTORIKE NË SHËRBIM TË ATDHEUT

Sylejman Lutolli ”Ta kujtojmë historinë”, poezi ,botoi autori, shtyp në shtypshkronjën “Mozaiku” Besianë

Nga Milazim KADRIU

Poeti llapjan, Sylejman Lutolli, para lexuesve tanë është paraqitur me librin e tij të dytë me poezi atdhetare. Në poezinë e Sylejman Lutollit vend qendror zë tema atdhetare ku u këndon personaliteteve të njohura kombëtare. Ai është përkushtuar që para lexuesit të sjell poezitë që pasqyrojnë veprën e atdhetarëve llapjanë e në masë të madhe atyre nga vendlindja e tij Llapashtica. Ai thur poezi për shumë personalitete që ndoshta shumë edhe nga vetë llapashticasit nuk kanë pasur njohuri të duhura për veprën e tyre. Lutolli shkruan për trimat nëpër periudha të ndryshme që kanë luftuar për lirimin e vendit që nga Lufta e Dytë Botërore e deri në luftën e lavdishme të UÇK-së.

Nëpërmes këtyre vargjeve të librit “Ta kujtojmë historinë ” krijohet përfytyrimi për heroizmin, atdhedashurinë, virtytet, idealin, trimëritë e figurave që në periudha të ndryshme zhvilluan luftë kundër pushtuesit shekullor serb. Pushtues ky që ndaj popullit autokton shqiptarë në këto troje zhvilloi terror e krime deri në luftën e fundit kur djemtë më të mirë të popullit shqiptarë të rreshtuar në radhët e UÇK-së dëbuan njëherë e përgjithmonë nga vatrat e tyre okupatorin serb.

Libri “Ta kujtojmë historinë ” i Sylejman Lutollit sikurse edhe libri i parë i tij me poezi kushtuar dëshmorëve të UÇK – së të ZOLL – it, me titull “Ritme Lirie”, shënon një etapë të historisë së lavdishme të popullit shqiptar dhe sakrificën deri në flijim për t’u çliruar nga pushtuesit.

Autori i librit, me një ndjenjë të hollë iu ka qasur portretizimit të personazheve të këtij libri të etapave të ndryshme ku shumica janë nga fshati Llapashticë i Besianës por edhe të disa trimave personaliteteve që kanë dhënë kontributin e tyre të çmuar për lirinë e Kosovës. Disa nga poezitë janë të shkruara edhe në akrostik. Kjo përmbledhje e poezive të Lutollit përpos që shënon një vlerë të mirë artistike, por aq më tepër shënon një kronikë të ngjarjeve në formë të fragmentarizuar të kohës që e kemi jetuar. Prandaj, në këtë dimension, duhet shikuar si një vlerë dhe përkushtim të ngjarjeve në kohë të ndryshme deri në epokën më të lavdishme të shqiptarëve.

Autori ka arritur të nxjerrë në dritë disa nga personalitetet që gjeneratat e reja pak ose fare pak kanë ditur për veprimtarinë e tyre atdhetare, të cilët kanë shërbyer me vite e dekada si luftëtar të dalluar për ruajtjen e kufirit dhe çlirimin e territorit nga okupatori. Për të prezantuar sa më saktësisht veprimtarinë e tyre autori librin e fillon me vargjet të titulluar “Në kufi në Merdar, trimat luftuan me barbarë”, ku përpos vargjeve jepen edhe emrat e të gjithë trimave të kësaj ane që ishin të rreshtuar nënë komandën e Ilaz Havollit në mbrojtjen e kufirit në Merdar. Libri është ndarë në katër pjesë ku në secilën pjesë të librit në poezitë e Lutollit bëhet fjalë për aktivitetet e shumta të luftëtarëve dhe patriotëve të tjerë të kohës. Në pjesën e parë “Nuk jam qyqe, por komandant”, Lutolli pasqyron trimëritë e luftëtarëve llapashticas të cilët mbrojtën kufirin në Merdar në vitet e 40-ta. Numri i luftëtarëve llapashticas por edhe të tjerëve që ishin nënë komandën e Ilaz Havollit ishte i madhe dhe që nuk lejuan të depërtojnë në këtë anë forcat sllavo-çetnike. Në pjesën e dytë “Ora e historisë me ty për shqiptar agoi” i kushtohen luftës së UÇK-së dhe disa dëshmorëve të kësaj lufte. Të gjitha poezitë në këtë pjesë janë të shkruar në akrostik. Në pjesën e tretë “Flakadan i trojeve etnike” që po ashtu është e shkruar në akrostik autori prezanton disa nga veprimtarët e dalluar të çështjes kombëtare nga Llapi që kanë dhënë kontributin e tyre në periudha të ndryshme dhe që veprimtaria e tyre ka qenë frymëzues për djemtë e UÇK-së. Edhe pjesa e katërt “Ta kujtojmë historinë “ i kushtohet kryesisht luftës së lavdishme të UÇK-së dhe përjetimeve të popullit para kësaj lufte, dëshirës së madhe për çlirim si dhe kontributit të popullit për luftën, por, autori jep edhe porosinë që gjeneratat të mos e harrojnë, por ta kujtojnë historinë.

Edhe në këtë libër sikur në librin e parë në poezinë e autorit Sylejman Lutolli tema e Kosovës zë vend qendror, në radhë të parë personalitetet e shquara të kombit, e në veçanti ato të trevës së Llapit ( e në këtë rast të Llapashticës ), ndaj të cilëve autori ndjen obligim moral, intelektual dhe kombëtar për ta strukturuar poetikisht sakrificën e tyre në shërbim të atdheut dhe të popullit në periudha të ndryshme historike e deri në ditët e sotme.

(Vota: 21 . Mesatare: 5/5)