Kulturë
Jusuf Buxhovi: Varja e poetit në Gjakovë në kohë murtaje
E shtune, 21.08.2021, 12:53 PM
VARJA E POETIT NË GJAKOVË NË KOHË MURTAJE
Nga
Jusuf Buxhovi
Kah
dreka mora vesh se në kullën e Kajmekamit
ishte mbajtë gjykimi i patër Colit,
Shpend Vokshit e Shaqë Himës. Me ta ishte nxjerrë në gjyq edhe Selamiu,
vjershëtari i vetëm i qytetit tonë. Që të gjithë ishin paditë për veprimtari
armiqësore kundër perandorisë dhe ishin dënuar me vdekje, dënim ky që do të
kryhej po atë ditë me varje në Namazxha.
Lajmi
për dënimin me varje të patër Colit,
Selamiut, Shpendit dhe Shaqës, më erdhi në çardak nga zani i tellallëve që po
çirreshin në të katër anët. Me shikimin e përhumbur andej kah Ereniku
gjarpëronte Rekës, rrija i ngrirë dhe sikur shihja Kajmekamin të më thoshte se
lufta jonë tashma kishte fillue dhe se ajo nuk do të ndalej pa i marrë kokat
tona...
Dikur
vonë, Mikeli plak erdhi i shkallmuem
fare dhe me fjalët që mezi nxirrte më
tha se varjet në Namazxha ishin kthyer
në një sherr të madh me zabitët, me ç'rast ishin kallë edhe flamujt e sekteve të shumta
perandorake. E gjitha kishte ndodhë
çastin që patër Colit ia kishin vu
litarin dhe ai kishte thirrur „rroftë gjuha jonë“. Ndërsa Selamiu kishte nisë
recitimin e vargjeve:
“
Pushtes, o të marrë,
çka
keni lypë në Gjakovë
me
njëqind flamuj me lara
dhe
me ilahi të pakuptueshme
për
me ardhë...”
Plaku
tha se litari ia kishte lënë përgjysmë vjershën Selamiut, siç ua kishte lënë
ngojë edhe ato që Shpend Vokshi dhe Shaqë Hima zunë me i thanë për lirinë dhe
gjuhën tonë...
(Shkëputje nga romani "Shënimet e Gjon NIkollë
Kazazit", botimi i polotësuar 2021)