Kulturë
Hysni Alushi: Çamëri, nuse me halle
E diele, 06.07.2008, 02:59 PM
Hysni Alushi: Unë e kam ëndërr të shkoj, por me dy këngët e bëra me zemër, shpirtërisht, ne kemi shkuar në Çamëri
Çamëri, nuse me halle
Nga Albert Zholi
Këto ditë, në një nga sallat e hotel “Tirana International”, u promovua klipi i këngës “Çamëri nuse me halle”, i këngëtarëve Enkelejda Arifi (Alushi) dhe Hysni Alushi. Në këtë promovim kishte shumë të ftuar kryesisht njerëz të artit dhe të kulturës, ku mund të veçojmë dy Artistët e Popullit Margarita Xhepa dhe Tinka Kurti. Pas këngës shumë të suksesshme “Vaj e mall për Çamërinë”, kjo këngë, ishte një nismë tjetër e këtyre dy këngëtarëve për të përcjellë plagën e madhe të popullit të Çamërisë, plagë, e cila jo vetëm që nuk gjen shërim, por është lënë në heshtje absolute nga politika shqiptare. Teksti i këngës nga Jorgo Papingji, muzika nga Edi Balili.
Z. Hysni, kohët e fundit jeni paraqitur vetë me këngë për Çamërinë, edhe në fillimet tuaja Çamërisë i keni kënduar?
Unë kam filluar të këndoj që nga vitet 1985. Dihet, atëherë kam kënduar këngët e realizmit socialist. Për herë të parë kam kënduar me këngëtarin Pajtim Struga kur ishim ushtarë në Tiranë. Prej asaj kohe kam marrë pjesë gjithmonë në ansamblin e Repartit ku bëja gjithmonë zërin e dytë. Pastaj kur u lirova nga ushtria kam kënduar në Rrogozhinë, në Pallatin e Kulturës të Rrogozhinës. Më vonë, fillova aktivitete në pallatin e rinisë në Durrës. Kënga ime mori profilin e plotë kur u angazhova me grupin e Çelo Mezanit në vitin 1988.
A ishe pjestar i këtij grupi kur u këndua për herë të parë Çelo Mezani?
Jo, atë vit unë kam qenë i vogël. Por pas vitit 1988, kam qenë pjesë e pandarë me grupin e Çelo Mezanit.
Mund të na flisni diçka për origjinën tuaj?
Unë jam djalë Gurse dhe nip Myrsele (Çamëri, Greqi). Babanë e kam nga Gurza zona e Filatit dhe nënën nga Marsela. I ndan një lum fshatin e babait, me atë të nënës. Babai im nuk dinte të kërcente, por ishte një polifonist i mrekullueshëm.
A keni shkuar në Çamëri?
Jo, ende. E kam ëndërr të shkoj në Çamëri. Unë e kam ëndërr të shkoj, por me dy këngët e bëra me vajzën e xhaxhait, me zemër, shpirtërisht, ne kemi shkuar aty. Ja, ne sot promovojmë klipin e këngës “Çamëri nuse me halle”, pas këngës së suksesshme “Vaj e mall për Çamërinë”. Unë ëndërroj se, n.q.s do të marr tokën e babait, do të ngre një çadër në mes të oborrit të shtëpisë së vjetër dhe do të këndoj një këngë çame, ku të kem unë dëshirë, në Çamëri. Kjo do të ishte kënaqësia më e madhe për mua.
Prindërit tuaj a jetojnë dhe a ju kanë lënë ndonjë amanet?
Babai im gjithmonë thoshte se po të ngelem edhe me një këmbë edhe me një dorë do të shkoj dhe ta shikoj vendlindjen time. Them se me këtë këngë që kemi bërë unë me gojën e zemrës kam shkuar në Çamëri, në shtëpinë e tim eti. Edhe vargjet e këngës, sikur janë të tijat
Me një sy do të shikoj
Sa herë malli të më marrë
100 herë të më gatuash
Një mijë herë unë do bëhem çam
Unë mendoj se kam plotësuar sado pak dëshirën e babait tim.
Si janë ngritur këto këngë për Çamërinë?
Kemi lëvizur shumë, kemi biseduar, dëgjuar, shfletuar për Çamërinë. Nuk e imagjinoni dot sa punë është bërë për këto dy klipe. Promovimi i parë u bë në Kosovë, në Gjilan, Prishtinë, Dibër të Madhe, Shkup.
Kënga e parë është pritur më mirë në Kosovë se sa në Shqipëri?
Po është ndjerë më shumë. Por edhe në Shqipëri na thonë se, nuk jemi çam, por ajo këngë është e bukur.
Po tani a keni ndonjë album për Çamërinë?
Ky album do të pasohet bashkë me një klip.
Beson se kjo këngë do ta sensibilizojë popullin shqiptar për problemin e Çamërisë?
Refreni është mjaft i fuqishëm. Ka mesazh. Besoj se diçka do të realizohet. Koha punon për Çamërinë.
Ju jeni një familje këngëtarësh?
Nuk jemi shmë të njohur, por i kemi ruajtur ato traditat nëpër familjet tona. Unë edhe Enkelejda kemi pasur fatin të dalim në skenë.