Diadema Stil: Të ekspozuara ndaj përjashtimit social...

Të ekspozuara ndaj përjashtimit social...

Nga Diadema Stil

Të jeshë grua pa mbështetje në Shqipëri, do të thotë të jeshë e ekspozuar ndaj të gjitha rrisqeve të një jete të vështirë, shpesh e shoqëruar me dhunë dhe përjashtime sociale. Institucionet ekzistojnë thuajse vetëm në letër, pasi realisht ata janë të pamundura për të mbrojtur dhe garantuar liritë dhe të drejtat e tyre.

Sot gratë dhe vajzat me probleme në familje, si dhuna fizike e psikike, etj, jo vetëm në zonat rurale por edhe në qendrat urbane, perbejne një problem serioz për shoqërinë shqiptare. Përtej fakteve dhe statistikave fshihet një realitet tejet problematik, i cili nuk zgjidhet me seminare e simpoziume, por me ligje dhe vullnet të plotë institucional.

N.M nga Korça, përzihet nga shtëpia nga djali 19 vjeçar, i bashkëshortit të saj të ndjerë, Arbenit, të cilin e pati dashur dhe rritur, sikur të ishte nëna e tij biologjike. Drama e saj nisi në vitin 2016, kur martohet në Korçë me një burrë me fëmijë, dy vajza dhe një djalë, çfarë bëri që prindërit e saj t'ia mbyllnin derën përgjithmonë. Dy vajzat e bashkëshortit të saj jetonin me të ëmën, ndérsa djali me të atin Arbenin, me të cilin ajo lidhi jetën e saj.  Pas humbjes së të shoqit, i cili ia la amanet të jetonte në shtëpinë e tyre, me të birin, ky i fundit nisi një dhunë sistematike ndaj njerkés së tij, e cila, megjithë denoncimet në polici, nuk gjeti mbrojtjen dhe  mbështetjen e duhur. E përzunë nga shtëpia ku kishte investuar mund dhe dashuri, ndërkohé që në shtëpinë e prindërve nuk kthehej dot, pasi ata e kishin abandonuar për shkak se qe martuar me një burré me fëmijë, pa miratimin e tyre. E mbetur né rrigë të madhe, pa punë e të ardhura, sikur të mos mjaftonin këto, do të vazhdonte dhuna psikologjike e fizike ndaj saj, nga djali i bashkëshortit, që nxiste dhe paguante njerëz për ta përndjekur. E sëmurë rëndë nga këmba dhe kolona vertebrale, jeta i ofron kësaj gruaje sfida të rënda, që institucionet thuajse inekzistente në Shqipëri nuk i japin asnjë lloj mbështetje për t'i përballuar.

Shifrat e dhunimit deri në vrasje të paralajmëruara të grave e vajzave tona janë alarmante dhe tregojnë një realitet të trishtë, që ka ardhur duke u agravuar.