Edison Ypi: Si qëmoti

Si qëmoti

Nga Edison Ypi

Udhëtimet të bëhen vetëm me tren me qymur me lokomotivë të zezë që bën çuf-çuf duke kaluar nëpër fusha, pyje, lugina, fshatra rrëzë kodrave.

Ka s'ka udhëtarë në tren për të zbritur a në stacion për të hipur, treni të ndalojë në çdo stacion.

Pamja e stacionit kur treni s'ka ardhur ose ka ikur, është një boshllëk në shpirt, një pikëllim marramendës estetik.

Më të shijshmit e stacioneve janë ata ku në tren as hypën as zbret kush, ata ku treni kur ndal qan, kur niset vajton.

Të vetmet përshëndetje lamtumire që lejohen në stacionet e trenave janë ato me psherëtima, shami që valavitet në erë, lot në sy.

Selfiet të dënohen me rjepje lëkure, prerje e mishit me gërshërë, varje në litar, ose pushkatim në vend, pa gjyq.

I njëjti dënim për grykësat që dalin në foto të lumtur para pjatave të sapozbrazura.

Romanet të shkruhen me penë e bojë dhe të lexohen ulur në karrike pranë dritares me vështrimin larg në horizont dhe një gotë verë në pravaz.

Nuk është roman i mirë ai për të cilin ajo i thot atijz: “Të dua shumë”, por kur ai i thot asaj: “Të dua më tepër se Leonardo Monalizën, Dante Beatricen”.

Kush kapet duke e pritur të dashurën me kufje në vesh ose duke shkruar mesazhe në celular, të dënohet 7 vjet burg pa të drejtë apelimi.

Autorët që kërkojnë “forma të reja” të shkruari të shkohen në hell të gjallë.

Të mos lejohet të shohësh më tepër se 1 film në javë. Kurrë në televizor. Vetëm në kinema rradha kaq, karrigia aq. Kush kapet duke parë film në kompjuter, të shpallet budalla noterik dhe të dërgohet urgjent në çmendinë.

Përveç avullit, korentit, barutit, synetllëkut, mullirit të kafes, mbathjeve të mëndafshta të femrave, kush tenton të shpiki të tjera kollajllëqe që ngathtësojnë trupin dhe mpijnë trurin, si për shembull kolltuqe të rehatëshme, dyshekë të butë, jorganë të ngrohtë, të dënohet ta kalojë pjesën e mbetur të jetës prapa maleve ku ta përshëndesi arusha "mirmëngjez".

Makina të ndizet me manovelë. Ndenjëset të jenë të ngurta. Xhamat të ulen e të ngrihen me një rrip. Motori të bëjë zhurmë sikur thyen arra. Makina të nxjerri pak tym nga pas.

Lavatriçja mund të vazhdojë të ekzistojë, por e thjeshtë, pa ndërlikime elektronike.

Frigoriferi, ky dimër i panevojshëm, ky dreq që na sëmur gurrmazët, të lejohet të përdoret vetëm si mjet eutanasik për ata që kanë kuriozitet të papërmbajtur për të parë çfarë ndodh përtej murit në jetën tjetër.

Sharqinjtë dhe shishet e kosit të freskohen duke i zbritur brenda një koshi me litar në pusin që ndodhet enkas në oborr.

Ndalohet përdorimi i ashensorit si shpikje djallëzore që favorizon ngathtësinë dhe dhjamosjen.

Kondicioneri i ajrit të shpallet dhe pushkatohet pa gjyq si “Armik i Shëndetit të Popullit”.

Asgjësimi i kondicionerëve me çdo mjet dhe çdo mënyrë të shpallet detyrë patriotike.

Kush shkatërron sa më tepër ventilatorë dhe kondicionerë t'i jepet titulli i nderit "Mjek Autodidakt".

Kush ha, qoftë edhe pa dijeninë e vet, ushqime të modifikuara genetikisht, dënohet të mos hajë e të mos pijë për 60 ditë.

Pse bëhet lufta, s'ka pse ta dijë ushtari që zhgërryhet në llogore, e di gjenerali që luftën e ndjek nga maja e kodrës.

Ushtari të lejohet të mbajë me vete fotografinë e të dashurës. Nëse të dashur nuk ka, mund të mbajë fotografinë e nënës shoqëruar me vargjet lakrimogjene të Eseninit.

Ushtarit të plagosur të mos i lejohet të qurravitet pas çdo zuske, por vetëm të dashurojë në mënyrë platonike infermieren që i lidh plagët.

Për habere të ngutëshme të dërgohen dhe merren vetëm telegrame. Për komunikime të gjata, të përdoret letër e shkruar me penë e bojë mbyllur në zarf që laget me gjuhë, ngjitet me tutkall, adresë, pullë, kuti postare, heshtje, pritje, ankth, derisa ta japi në dorë ose ta fusi poshtë derës një postier me biçikletë dhe uniformë.

Mallkuar qoftë dita kur do shpiken Interneti dhe celulari.

Bekuar qoftë dita kur do harrohen.

Televizori të mos përdoret për filma por vetëm për habere.

Filmi të shihet në kinema rradha kaq karrikja aq.

Femër e bukur të quhet vetëm ajo që plotson kushtin e Gina Lollobrigita-s:

“Femër tërheqëse nuk është ajo që bëhet aq më joshëse sa më tepër çvishet, por ajo që bëhet aq më e dashur sa më tepër vishet”.

Problemet mes individëve, sidomos ato me përmbajtje sentimentale, nuk zgjidhen me llogje Kavaje por me Duel me shpata ose kobure.

Televizioni që ka më tepër personazhe të urryer dhe të famshëm sesa personazhe të dashur dhe jo fort të njohur, të hidhet në plehra pasi të pështyhet me ceremoni.

Natën porta mbyllet me një lloz të ndryshkur që sa herë lëviz kërcet me një gërrvimë misterioze dhe makabre si në poezitë e Edgar Allan Poe.

Të dënohet me jo më pak se dhjetë vite në burgun e Reçit cilindo që edhe nuk jeton si qëmoti edhe ankohet se i këndojnë 200 zhaba brenda kokës, i rrjedhin qurrat, e zë gripi, mezi i del kaka, i ther mesi, i bën naze rrushi.