Ibrahim Gani: Më thuaj ç'të bëj Shqipëri?

Ibrahim Gani

Më thuaj ç'të bëj Shqipëri?

Më kot shtëpia më pret,

Kur kthehem, as vetë s'e di.

I hidhur hallemadhi kurbet,

-Më thuaj ç'të bëj Shqipëri?

Gjakmarrja si qen pas më ndjek,

Varra e saj një pus i zi…

Mali rënkon, deti buçet:

-Më thuaj ç'të bëj Shqipëri?

Plehrat ombrellë në Parlament,

Gënjeshtra, mburrje e lavdi…

Dashnorja mëshqerrë në treg…

-Më thuaj ç'të bëj Shqipëri?

Shoveni grek pis mot e jetë,

Në oborrin tim kërkon kufi.

Në kishë prifti greqisht pëllet,

-Më thuaj ç'të bëj Shqipëri?

Flas me vetveten ditë e net:

-Dëgjo zuskë demokraci,

Horllëku për ty nur e mbret…

-Më thuaj ç'të bëj Shqipëri?

Ke dhjetëra vjet, o deputet,

Na mbyte me oratori.

Eh, xhepi yt thes e tërmet,

-Më thuaj ç'të bëj Shqipëri?

Dialog brilant në Parlament:

-Unë kusar?! Vrasës je ti,

Edhe në ferr pas do të ndjek…

-Më thuaj ç’të bëj Shqipëri?

Pas sharjesh lumë, në Bozdovec:

-Koleg të gjej me shtatë dolli;

Tymnaja për në çadër, lezet…

-Më thuaj ç’të bëj Shqipëri?

Zana s’guxon të dalë në shteg,

Thepi i pushkës e mban në sy…

-Ku je moj Zanë, shkolla thërret,

-Më thuaj ç’të bëj Shqipëri?

Bilbili i policit buçet:

-Kundravajtje prit aty…

(pesëqinshe vafsh me shëndet!)

-Më thuaj ç’të bëj Shqipëri?

Osebeisti lumin a det

Sërish e derdh bajagi:

-Tolerancë! S’ka tjetër shteg…

-Më thuaj ç’të bëj Shqipëri?

Ky ligjërim mbi njëzet vjet,

Grami në brazda, monotoni…

Lotët rrungajë, pushteti qesh,

-Më thuaj ç’të bëj Shqipëri?

I dhemshuri popull Poet,

Të mbiu ferra në sy…

-E mprehta kosë ferrat i pret…

Më thotë NËNA SHQIPËRI:

Tiranë, 2004-2006