Qazim Shehu: Ujëvarat

QAZIM  D. SHEHU

UJËVARAT

Legjendet e shpikura shkrofëtijnë

Nëpër shkëmbinj,

Kujtime kuajsh ndrijnë,

Që i mbajtën mbi shpinë.

Kuajt në krah shkrepash thyen

Gjunjët nga lodhja,

Mbi një ujëvarë shuan syrin

Mbi gurë

Gjurmët u ndizte koha.

Jele legjendash dynden nëpër muzg

Të trazuara,

Nuk erdhi për to asnjë krushk,

Krushqit i mori vetura.

Veç një rapsod ,thuri vargje të të epërme,

Për kuajt po,

Ujëvarat si shkrofëtima të shekujve

Ua la poetëve...

ROBERT BERNSIT

Atje në malësi do marr Robert Bernsin

Për t`i thënë, eja o mik,

Ta ngjisim me gjunjë shkrepin,

Benzin ta lëmë në Lunik.

Kostenja s`ka rrugë ,rruga s`i duhet,

Kostenja ka pyje dhe një qiell të ngrohtë,

A të kujtohet kur  më mësoje si shkruhet

Dhe unë librin tënd mbaja në kokë.

Eja, o mik ,në majat e larta frymën të ndal,

Se “zemra ime është në mal”,

Se vargun tënd aq të thjeshtë,

Kolonë vetebrore e mban një kreshtë…

LUFTËNXITËSVE

Zbres Njëqind vite

Arrij tek Lufta e Parë,

Përgjysmoj vitet, tek e Dyta

Shkoj duke qarë.

Mund te ngjitem njëqind vite

Të shkoj tek e Treta,

Ajo aq lehtë ngjizet

Sa dridhet jeta…

E prapë shpresoj, ndonjë psikopat

Mos therë yllin e paqes me thikë.

Ndryshe kjo botë kaq e pat,

Mund mos jetë as shenjë në galaktikë…

NA DUHET NJË TRILL…

Ti ma zbraz zemrën nga rëndomtësia,

Një  diell në rreth,

Mblidhet floku jot biond,

Çlidhet pastaj  fije fije

Shushërin ujëvarë në hije.

Them me vete, kjo është dashuria

Si mundet ajo të vijë nga flokët,

Teksa shikoj gra me thinja

Që biondohen për marrokët…

Kur ngjyra del, vjedhjen e saj na tregojnë

Po na duhet një trill sa për të kujtuar

Se na pëlqen  të dashurojmë…