Kostaq Duka: Të dua si rilindje

Kostaq Duka

Të dua  si rilindje

-Korçës-

E dua me mall të përvëluar kur jam larg

i mërzitem i dëshpëruar kur i ri afër.

Qyteti im! Plakë e nuse, nuse e plakë.

Të trembem si vdekja e ngadaltë

të dua si rilindje pas një dimri të egër, të gjatë.

Rock and roll

Rock and roll…

shkrepëtimë stralli a klithmë lirie?!

Gurë

që rrëzohen me rrapëllimë

a dallgë stërmëdha që shkojnë e vijnë?!

Shpirt i trazuar

që shpërthen me lemeri,

a zemër e tronditur

që do më shumë qiell. Më shumë kaltërsi?!

Rock and roll….

Njëherë unë e njëherë ti….

A ishte i varfër

a ishte i pasur nuk, e di.

Kënga thotë: Kisha një këmishë ngjyrë gri

njëherë e vishja unë

njëherë e vishje ti.”

Duan të thonë kjo është këngë korçare

duan të thonë kjo është këngë greke.

Për ta shuar “sherin” po këndoj:

Kisha një këngë kurbeti

lindur gjithë mall e dashuri

njëherë shqip e kendoja unë,

njëherë greqisht e këndoje ti…..

Liberta, freedom

Liberta.

Freedom.

Liri-liri.

Qiell i kaltër, i paanë, bardhësi.

Liberta.

Freedom.

Liri- liri.

Në tërë gjuhët e botës

kjo është kryefjalë.

Të gjitha një sinonim e kanë: Amerikë.

Dua kalin

Kur lanë fshatin

babai i premtoi

ti falte tërë Amerikën, aeroplanin

elefantin e luanin

pishinën, detin, oqeanin.

I premtoi e çfarë si premtoi atij 5-vjeçari.

Por vogëlushi pas gjumit të parë në Amerikë

në zgjim, me sy të përlotur kërkoi kalin.

Shkurt 2014