Ramiz Lushaj: Malet janë si njerëzit

Ramiz LUSHAJ

MALET JANË SI NJERËZIT

Malet kajnë si njerëzit:

Për heronjtë si i mbajnë në gjinin e vet,

Për shkrimtarë e artista që i ranë në kryeqytet

Për rininë e ikun përtej deteve, në kurbet...

Malet kajnë me të madhe, kajnë plot jehonë.

Me lotët e tyne e krijuan ujëkaltren Valbonë.

Malet qeshin si njerëzit:

Kur në maje të tyne ngjiten burra malësie me plisa...

Kur fyelli i Ali Mulës i fut në valle pyjet me lisa,

Kur nëpër Lugje të Verdha jehon Eposi i Kreshnikëve,

Kur Haxhi Zeka e Tahir Sinani trokojnë nëpër këto vise....

Malet tue qesh si diell e deri në qiell, iu ujëgufin vrella prej gjoksit,

E bajnë Valbonën mrekulli të natyrës, të njeriut e të Zotit!

Malet janë si njerëzit:

I nderojnë kodrat e vogla që i kanë poshtë vetit

I duan lule e lisa t’iu rriten edhe maje thepit

Qiellit kur i sjell bubullima e rrufe i qëndrojnë burrnisht.

Lumturohen kur iu japin djersë, dije e mirënjohje bijat e bijtë.

Tropojanët i kanë nderue, begatue e gëzue malet e veta gjithmonë,

Në shpirtin e tyre kanë nga një Shkëlzen, nga një Valbonë...

Shqipëri Etnike, 10 shkurt 2014