Xhevdet Ukalli: Ardhja e Skënderbeut në Shkup

Xhevdet UKALLI

Ardhja e Skënderbeut në Shkup

Nuk e ndiente fare shtatin

Kishte humbur trokun kali

Por artisti pat dhënë fjalën

Fjalë e dhënë, të çon prej varri

Ishte nisur që me natë

Në sup të mallit të pashuar

Ja, pas pritjes kaq të gjatë

Në krah të atdheut, duhej shkuar

Rruga çilej bashkë me dritën

E një dite shumë të rrallë

Për çudi ndjeu si lëvizi

Pas kaq shekujsh, krahu majtë

Eci eci  kështu trimi

Krenar u ndal nën Kala

Përshëndeti kë mbërrini

Kë takoi e cilin pa

Kur vringëlloi shpatë e tij

Veç lirinë, për popull deshi

Për zullum e për zaptim

Ai kurrë, armët s’i ngjeshi

Po të shkoni në veri

Atje krahë, ku shtrin vatani

Do t’ju presë me krenari

I pashoqi, Gjergj vigani

Në mes Shkupit hedh shikimin

Pamjet-mburrje i merr dheu

Kryefjalë për Kryetrimin

Qe dhe mbet  Atdheu!