SHKK “Anton Pashku”: Kumtesë

Shoqata Kulturore e Kosovës

“Anton Pashku”

Prishtinë

Më 4 shtator 2012

K U M T E S Ë

Shoqata Kulturore e Kosovës “Anton Pashku” në Prishtinë, pasi e shqyrtoi çështjen e organizimit dhe të kremtimit të festave kombëtare e shtetërore në Republikën e Kosovës, përkrahu propozimin për reduktimin e festave, që përcjellen me ditë pushimi në Republikën e Kosovës. Megjithatë, kjo shoqatë propozon që për Ditën e Festës së Pashkëve, që gjithmonë bie ditën e diele, të lejohet kremtimi, përkatësisht pushimi ditën e hënë.

Njëherësh, kjo Shoqatë është kundër pushimit me rastin e Festës së Shën Marisë së ortodokësve, që kremtohet më 28 gusht. Në asnjë vend në botë, e as në Serbi apo në Rusi, kjo festë nuk e ka karakterin e festës shtetërore, që të pushohet atë ditë.

Megjithatë, SHKK “Anton Pashku” i propozon institucioneve shtetërore të Republikës së Kosovës që të shqyrtohet mundësia që 5 shtatori – Dita e kalimit në amshim i Nënës Tereze të shpallet festë shtetërore. Për këtë kësaj kumtese ia bashkangjesim këtë arsyetim: 

NË NDERIM TË VEPRËS DHE FIGURËS SË NËNË TEREZËS

5 SHTATORI - TË SHPALLET FESTË KOMBËTARE 

Nëna Tereze, me punën e saj të madhe, me veprat e saj të mëshirshme, me dashurinë e saj të pakufishme, me përkushtimin e saj të palodhshëm, fitoj epitet më të mëdha në botë. Ajo, me sakrificë dhe devotshmëri, u bë personalitet i admiruar dhe i dashur në gjithë botën.

Atë e duan dhe e nderojnë të gjithë. Të krishterët dhe jo të krishterët, hindusit dhe myslimanët, ateistët dhe besimtarët, shkencëtarët dhe artistët, politikanët dhe aktivistët e ndryushëm. Me një fjalë, ajo është gruaja e vetme, që fitoj epitetin e një Nëne për njerëzimin.

Nënë Tereza, është thesar i pashtershëm për njerëzimin, në figurën e së cilës, gjejmë shpresat për jetë, edhe kur ato duket se janë shuar, gjejmë motivet për punë dhe dashuri, edhe kur ato objektivisht nuk ekzistojnë. Ajo ishte dhe mbetet një Nën; e dashurisë.

Nënë Tereza, me origjinë shqiptare, e ndriti emrin shqiptar dhe e lartësoj në piedestalin më të lartë të figurave botërore. Këtë gjë e dëshmoi ajo vet, kur mori Çmimin Nobel për Paqe, kur ndërhyri para personaliteteve të mëdha botërore, për të ndihmuar Kosovën dhe kur mburrej për origjinën e saj shqiptare.

Prandaj, kombi shqiptar, të cilit ajo i përket, duhet të bëj më shumë për të, që vepra e saj të mishërohet ndër ne dhe të bëhet udhërrfim për brezat e ardhshëm.

Duke u nisur nga fakti se çdo komb, ka festat e mëdha kombëtare dhe fetare, edhe shqiptarët, duhet ta bëjnë 5 shtatorin festë kombëtare në nder të Nënë Terezës.

Prandaj, apelojmë të institucionet tona dhe ato të Shqipërisë, që të harmonizojnë qëndrimet dhe të vendosin që 5 shtatori të shpallet festë kombëtare, kushtuar nobelistës shqiptare dhe humanistës më të madhe të botës - Nënë Terezës.

Shërbimi për informim i SHKK “Anton Pashku” në Prishtinë