Kulturë
Poezi nga Vaso Papaj
E marte, 15.03.2011, 08:10 PM
Vaso Papaj
Thirrmëni komunist
Thirrmëni komunist
Mua që linda skllav i komunizmit
Veç hajdut, bandit, mafioz mos më thoni
Do të qesh paksa se,…
befas do t’ më kërcënoni.
Do të hungërijë tërë natën telefoni
Thirrmëni komunist
Mua që komunizmi fëmijërinë më mori,
rininë, jetën
Veç spiun, kurvar, i atdheut tradhëtar
mos më thoni
S’ kam ditur kurrë të kthej fletën.
Thirrmëni komunist
Doni të mbillni tek unë indiferencën,
apatinë,
Unë kudo kam mbjellur shpresën,
dashurinë.
Shamëni ashtu siç shahet në sport bar
Uuff!...
Ç’ natë e gjatë! Ç’ ëndërr pafund!
Qeshje e hidhur nën hundë
Hee…thirrmëni komunist
Ju, shpura e tij, e paparë tjetërkund.
Kotësi
Gropë i bëtë kolltukët e Port Saidit*
Orë të tëra, gropë lëkurë e zezë
Nuk pushon së rëni zilja e celularit
Kot, fare kot, ju është bërë ves.
Thonj të zi sikur më mbysin në Flag Ship*
Seç lëpihen mbi syprina xhami gri
Akrepat e fosforit te muri cip mbi cip
S’ di, në kot po rrinë, a bëjnë dashuri.
Tym duhani vesh tavanin e Çollakut*
Missin ledhaton te lajmet, Ora News
Stresi m’ ësht’ bër’ mal, gërryen prej merakut
Më mbyt kjo kotësi, më mbyt, mezi e ngrys.
*Kafe-Bare në Durrës
Vendstrehimi im
N’ ato net’ të ftohta me hënën kallkanisur
Kur s’ dihej në të gjente në shtrat ndonjë agim
Në gjoksin tënd i zhytur, me heshtjen nanurisur
Të thoja lehtë te veshi: Je vendstrehimi im.
Kur bora qetësisht gjithshka e
Dhe flokët dhe çatitë dhe fjalët tona ngrinë
Në gjirin tënd u zhyta me heshtjen përqafuar
E përsërita prapë: Je vendstrehimi im.
Dhe ca vështrime shtrembër na shponin pambarim
Me puthje të padhëna që shpesh na shoqëronin
Refrenin përsëritja: Je vendstrehimi im.
E nëse ndodh një ditë, prej teje larg të jem
Do t’ doja prapë te veshi dy fjalë të të arrijn’
Nga tjetra bot’ qetësisht, përsëri do të të them
Të dua fort! E di?... Je vendstrehimi im.
Poeti dhe shiu
Nga larg ia behën vetëtimat
Në një vallëzim plot fantazi
Aty mbi det si balerinat
Si duket do të bjerë shi
Kam ditë, atë dhe unë kërkoj
Tek xhami yt thur simfoni
Lëpihem, shkas e ëndërra zgjoj
Pa hapma portën, ftom’ në gji
Këndoj edhe me shpirt godas
Orkestër me njëmijë buri
Dhe jet’ të sjell gjithmon’ nga pas
Ndaj lutem mos pushoj ky shi
Ka ditë
Ka ditë që jam duke kërkuar
E asnjë qen që të më dojë nuk gjej
Ndër kohë, që unë vet qent’ i urrej.
Sa herë të marr furgonin kam provuar
E për t’ u ngrohur, të shkoj te dielli, përtej
Ndër kohë, që vet furgonin e urrej.
Ka ditë kur vetëm ty të kam në mëndje
Dhe veç një pyetje tingëllon si një këmban:
Pse është gozhduar ai që dashuri shpërndan?
Ka ditë kur sinqerisht ndihem padron
Sikur gjak mbreti të më rrihte nëpër dej
Ndër kohë, që unë padronët i urrej.
Dhe do të gjunjëzohesha një dit’ pa drojë
Për të kërkuar dashurinë që kurr’ nuk po e gjej
Por ja, që s’ e bëj dot, gjunjëzimin e urrej.