Poezi nga Janaq Pani

Janaq Pani, Toronto

Ç'ËSHTË E MIRË E Ç'ËSHTË

          E BUKUR

Ç'është e mirë e ç'është e bukur?

Krahët kur i rreh një flutur,

kur flladit një fllad i hollë,

lulet kur i çel një mollë,

kur aroma shpërndan bliri,

kur fëmijës i qesh syri,

këngën kur e ndez gjinkalla,

kur vjen gjumi mbi qepalla,

kur në krahë të merr nëna,

kur trokasin bashkë dy zemra.

SEKRET I MBAJA

Lulet, gjelbërimi

porsa kishin çelur,

në buzë urimi

si mjaltë ish mbledhur.

Askujt s'ia tregoja

dhe sekret i mbaja

mamit t'ia dhuroja

në festën e saja.

NUK IA TREMBIN

  DASHURINË

Sot, te qipariz i lartë

shkrepëtiu rrufe e zjarrtë,

ra kaq afër dhe u tremba

thellë në gji më fshehu nëna

dhe më puthi sy e flokë,

zëri i saj si fllad i ngrohtë,

shokun nuk ia gjen në botë.

S'ka rrufe e vetëtimë

t'i trembë nënës dashurinë

pranë saj bëhem më trim

kush ma lind këtë guxim?

FOTOGRAFIA

Uuuu, moj mami, sa çudi

bëj me babin dhe me ty,

sa herë dal fotografi

po më luteni të dy:

"Shpirt i vogël, pa qesh pak

aparati kur bën traaak!..."

Mami, moj, lodheni kot,

i kurdisur nuk qesh dot!

Kur shikoj Tomin e Xherin

si po ndjekin njeri-tjetrin,

pa kuptuar hedhin grepin

fët e fët gazin ma nxjerrin.

Atë çast me zemër qesh

më shkon goja vesh më vesh.

Atë çast, moj mami, ti

traaak... më nxirr fotografi!

NESËR... NESËR

Kam dëshirë një akullore

këmbët mbaj para dyqanit,

mami më tërheq për dore:

"Nesër, nesër, xhani i mamit!"

Te kioska si shitore

dëshiroj librin mbas xhamit,

mami më tërheq për dore:

"Nesër, nesër, xhani i mamit!"

Dhe te Sheshi Skënderbej

më shkel syrin karuseli,

të vërtetën iu rrëfej

në mëdyshje mami ngeli.

Më pastaj një pikëz lot

i rrëshqiti poshtë syrit,

e kuptova, mami sot

qejfin dot s'ia bën të birit.

Vendim mora pas kësaj,

mos lotojë syri i mamit,

asnjëherë nuk do mbaj

këmbët përpara dyqanit...

LOTI NË SY

Një fëmijë nisi qau,

përse qau kush e di,

erdhi mami dhe ia thau

lotin e bukur në sy.

TE NËNKRESA JOTE

Te nënkresa jote

e qëndisur bukur

bëjnë shoqëri

një zog e një flutur

dhe gëzimi i mamit

si diell i purpur.

Kur bir ul qepallat

e bie në gjumë,

në ëndrrat e tua

vij e futem unë,

nga drita e syve

të dua më shumë.

GURRA E DASHURIVE

Eh, ç'mrekulli

që ka kjo botë,

t'i numurosh

do të jetë e kotë,

se mrekullinë

e mrekullive

e gjej te mami

te dritë e syve,

gurra që s'shterr

e dashurive.

KËNGA PËR MAMIN

Kur vjershën nisa të shkruaj

iu luta zogut tej xhamit:

- O zog i bukur, më thuaj

ti këngën tënde për mamin.

Por zogu u ngrit krahëlehtë

në qiellin e pastërt kristal:

- Për mamin, - tha, kënga rrjedh vetë

nga zemra e s'ka kush e ndal!