Demir Krasniqi: Dasma asht lama e budallëve

Parodi humoristiko - satirike :

DASMA ASHT LAMA E BUDALLËVE

                        Këndon dueti rapsodik:

Lefter Ahmaku  dhe Lahper  Zavraku

Ahmaku:

Moj  e mira nëpër talla –

N’ darsëm t’ huej njihet budalla !

Zavraku:

Moj e mira, që m’ zbret shkallëve –

Dasma asht lama e budallëve !

Ahmaku:

Moj e mira , nëpër shesh –

N’ darsëm t’huej bahet përshesh  !

Zavraku:

Moj  e mira , moj kurrqyshe ,

N’ darsëm t’huej nuk bahet ndryshe !

Ahmaku:

Moj e mira , nëpër thera –

Ke ngranë hudër – po t’ vjen era !

Zavraku:

Pa ngranë hudër s’ pata çare –

E kam shtrue nji lamë të madhe !

E kam shtrue nji lamë n’ mahallë –

Do t’i  fshijë njimijë duej tallë !

Shumë magari ka me pallë ,

Shumë e kali ka me u çmallë !

Nuk kam shti kuaj hamallë –

Do t’ fshijë lamë me do budallë !

Ahmaku:

S’ koka  lamë me kuaj t’ shkretë –

Koka darsëm me pesëqind vetë !

Pesëqind krushq me i çue n’ hotel ,

Se ta rrëzojnë shpinë me themel !

Zavraku:

Njani flet e tjetri keshë ,

Nja vjen veshë e tjetri deshë !...

Pinë duhan e raki t’ fortë ,

Mish të pjekun , presin tortë !...

Ahmaku:

Shumë do gra i pashë n’ sokak –

Gjokset shpluet e kamtë cullak !

A asht darsëm për shqiptarë ,

A hotel për striptiz bar ?!

Zavraku:

Tue luejt valle te karrikat ,

Do ahmakë , si i kanë pa çikat –

Krejt për kreje i kanë thye shishat ,

Copa – copa i kanë  shkye  këmishat !...

Bjen tupani rrak – tak – tak ,

Valle burrash kcejnë cullak !

Për me i kapë ma mirë kamera –

Hygjym bajnë me u kapë n’ llustera !...

Për me i pa gratë me dyzene –

Hygjym bajnë me u kapë për stene !

Me ba hatri me i mbet dikushit –

Thotë :”Po e luej Deli Agushin”!

Me ba kush mos me  ua bajtë  kajden –

Thotë: “Kështu po e luej Gajden”!

Me ba kujt me ia thye gotën –

Thotë :”Kështu po e luej Shotën”!

Me ba kush me e deshë jelekun –

Thotë: “Kështu po e luej Çyçekun”!...

Ahmaku:

Skuqen , fryhen , si çurana –

Kcejnë, bërtasin si hajvana !

Kapen n’ stenë , nëpër tavana –

Ua merr mendja se janë tarzana !

Njani – tjetrit i kcejnë mbi krah –

Tue luejt “Gajden” deri n’ sabah !

Zavraku:

Kinse , nderë me i ba patronit –

I afrohen mikrofonit ,

Urojnë dasmën me kangë të shkreta ,

Veç me i ndie gratë e veta !

Klarineta ngrehë gazela –

Shkarraviten nëpër tela !

Shtrydhet , ndrydhet harmonika –

Hypin , kcejnë përmbi karrika !

Kur nxjerrë tingujt violina –

Hypin, kcejnë mbi tavolina !

Kur i mëshojnë defit për koke –

Shkarraviten zhag për toke !...

Ahmaku:

Shkojnë në vesh – i thonë kangëtarit :

“Knoma kangën , mue , ma t’ parit ,

Se n’ gurbet – m’ ka rrokë mërzia ,

Due me ikë , me shkue te shpija !”

Zavraku:

Kur t’ iu bjen n’ krye rakia –

Mezi , gratë i çojnë te shpija !

Bash si derr , për toke shtrihen –

Vjellin, pshurrën edhe dhihen !...

Tej n’ sabah – s’ ka send me i la ,

Me gra t’ veta bien n’ bela !

Çka kanë pi e çka kanë ngranë ,

Krejt bakshishin çka e kanë dhanë –

T’ nesret vonë i bien pishman !...

Iu bien n’ mend çka kanë harxhue  –

Nji muej ditë kishin kalue !

Bajnë harxhime me hjekë mallë –

Darsma asht lamë për budallë !

Ahmaku:

Shujë , Zavrak, mos banë hajgare –

S’ ka randësi pse harxhon pare !

Parja vjen edhe harxhohet –

Njeriu n’ jetë – njiherë martohet !

Çka kish ba ai Sadik Dika –

I kish ra n’ krye mastika ,

Gjithë natën kish luejt me çika ,

Tue vallzue – i kish ra pika !

Zavraku:

Kështu ka ba edhe Zerzek Muja ,

Tanë tue kcye  në darsma  t’ huja ,

Para grave tu u ba heroj –

Edhe ate zemra e lëshoj !

Mbi rrasë t’ vorrit ia kanë shkrue :

“Heroikisht ra tue vallzue !”

                        Demir KRASNIQI