Kulturë
Poezi nga Janaq Pani
E shtune, 12.02.2011, 07:00 PM
Janaq Pani, Toronto
KAMARE NË ZEMËR
Ajo moshë ëndërrimtare
të harruar s'ka që s'ka,
brenda zemrës një kamare
e ka lënë si për bela.
Rri de mbyllur si arkivë,
çfarë fsheh? Ky shpirt e di,
ca kujtime stivë-stivë
që na kthejnë në rini.
Te një klasë me djem e vasha
të harreshëm e lodërtarë,
erdh' një çast veten e pashë
se me zemrën diç kish ngjarë.
S'dija si ta pagëzoja
atë çast si një magji,
veç te njera e kërkoja
ëmbëlsinë e syrit të zi.
Unë - mëzi ergjele,
ajo - zanë e drenushë,
sa i ëmbël çasti qe
kur më la ta puth në gushë.
Shtjella-shtjella i derdh flokët
si ujvarë përmbi supe,
sa zili ma kishin shokët
synë e zi të asaj çupe...
Si një yll që nis të bjerë
ai çast mbeti një ëndërr,
veç të dyve do na lerë
ndarja, kamaren në zemër.
I RRJEDHUR
Sa këpucë do kem grisur
përmbas bukurive bredhur,
unë mustaqe pa dirsur,
ato më quanin të rrjedhur
e shkonin për ku ishin nisur.
U kam dhënë dikur të drejtë,
fati im e kish të shkruar
kur një ditë, e bukura vetë
m'erdhi si flutur në duar
e më mbushi gaz e jetë.
CA VARGJE SI QENGJAT KËRTHI
I nisa të puthen me ty
e vendin tim të zënë
ca vargje si qengjat kërthi
lodronjës e çapkënë.
Dil priti krah' hapur si di
se kryet për ty lënë
k'to vargje si qengjat kërthi
lodronjës e çapkënë.
M'i puth në buzë e sy
harreshëm krahë do vënë
k'to vargje si qengjat kërthi
lodronjës e çapkënë.
Provo e merri në gji
do bëhet shpirti këngë
nga vargjet si qengjat kërthi
lodronjës e çapkënë.
Të falin aq dashuri
të ngjitin dhe në hënë
k'to vargje si qengjat kërthi
lodronjës e çapkënë.
NJË FERRË
Te shtegu i Pane në fushë
përskuqur si një paparunë,
në udhën e saj, një drenushë
po kthehej e ngrata nga puna.
Dhe ish për ta pirë në kupë
e bukur si çika floriri,
sa djali i Pane drejt çupës
lëshoi shigjetat nga syri.
Po çupa me sytë mbërdhe
shigjetat thellë i ka ndjerë,
e për bela havale
iu bë për fustani një ferrë.
Më tej mendimin ç'ta ngas,
i bëri magji ai Pani,
dhe pesë dekada më pas
s'iu nda ajo ferrë nga fustani.
CA PËRJETIME
Te unë nuk gjej gjë të veçantë
e të veçantë nuk gjen as ti,
në çastin kur ne jemi bashkë
i vjelim qiellit pak lumturi.
Me mërmërimën e zërit tim
e me shkëlqimin e syrit tënd
një marramendje gjer n'amëshim
te njeri tjetri ky çast e gdhend.
Se dashuria e vërtetë
si shpirt shenjtori zemrat na mbush
e çdo qelizë e mbush me jetë
por për ta parë s'e sheh askush.
Si një aromë dashuria
na ndjek pas hapi nëpër mote,
më deh në çast kjo lumturia
e vjen troket te zemra jote.
Mundohem fjalën të përzgjedh
e truhem mos të të lëndoj,
ashtu si bleta nektarin mbledh
atë më t'ëmblën për ty qëmtoj.
Një plak i mençur më thosh dikur:
" Çdo çupe, bir, çastin e prit
e buzëqeshjen shpalose nur,
te njera do jetë dhe fati yt.
Dhe ai çast do jetë flu
e dita merr një tjetër vlerë,
një qiell aq të lartë e blu
ju s'kini parë tjetër herë..."
Ca përjetim tani mbas vitesh
sot për të tjerë i nisa flur
të laja borxhin, që nuk më pritesh
të plakut e mençur dikur.