Vangjush Ziko: Vargje për balozin e bardhë

Vangjush Ziko

VARGJE PËR BALOZIN E BARDHË

VARRIMI I VJESHTËS

Dimri

mbuloi me flokë të rëndë

skeletet e Vjeshtës.

Thua, e thinji kjo

dhembje eshtrash.

Veç ketrat lëvrijnë.

Kërcejnë valle.

E dinë.

Drurët prapë do ngjallen.

KROI I LOTIT

U thinj livadhi

brenda një nate.

Fijet e barit

u thinjë.

Gjurmët e njerëzve

nëpër sokaket ngrinë.

Veç çurka e Kroit të Lotit

pikon përmbi ngricë.

Burimi në zemër të tokës

po zjen kazan' e rakisë.

BALOZI I BARDHË

Dimri lind i thinjur,

plak me huqe,

i panginjur.

Varros Vjeshtën vejushe.

Pranverës i sulet.

Balozi i bardhë

i ngrin

dhe i do burbuqet.

Dashurisë

s' i bën dot ballë,

s' pret sa t' i shfaqet.

Më gjunjë shkrin

mbi një manushaqe.

Dhjetor, 2010