Faleminderit
Milazim Kadriu: U përkujtuan Dëshmorët Afrim Zhitia dhe Fahri Fazliu
E merkure, 03.11.2010, 10:58 PM
NË 21 VJETORIN E RËNIES
U PËRKUJTUAN DËSHMORËT AFRIM ZHITIA DHE FAHRI FAZLIU
Nga Milazim KADRIU
Në 21 vjetorin e rënies janë përkujtuar dy dëshmorët e kombit Afrim Zhitia dhe Fahri Fazliu të cilët kanë rënë në një përleshje me forcat policore serbe në Kodrën e Trimave në Prishtinë. Në organizim të OVL të UÇK-së në Besianë në përkujtim të dëshmorëve tek varrezat e tyre në fshatin Lluga dhe Llaushë janë mbajt homazhe dhe janë vendosur kurora lulesh. Merrnin pjesë familjarë të dëshmorëve, bashkëveprimtarë, ish pjesëtar të UÇK-së dhe qytetarë tjerë liridashës. Ndërkaq në ambientet e shkollës fillore dhe të mesme të ultë në Lluzhan që mban emrat e dëshmorëve ,"Afrimi e Fahriu" me një program kulturo-artistik janë përkujtuar dëshmorët e kombit dhe është shënuar dita e shkollës që kremtohet çdo vit në këtë datë të shënuar historike,në ditën e rëniës së dy dëshmorëve të kombit Afrimit e Fahriut. Drejtori i kësaj shkolle Sheqir Krasniqi, tha se sot para nesh qëndrojnë obligime të reja në këtë realitet të ri të krijuar, që do të thotë se mësimdhënësit kontributin e tyre duhet ta japin në reformimin e ri të sistemit shkollor në mënyrë që të kemi një sistem shkollor sa më cilësor dhe frytdhënës. Ai tha se kjo shkollë me pietet e mbanë emrin e dy dëshmorëve kombit “Fahriu e Afrimi”, 2 nëntori është Dita e shkollës sonë dhe 21 vjetori i rënies heroike të dëshmorit Afrim Zhitia dhe Fahri Fazliu. Ndërsa drejtori i DA Nexhmi Rudari ku tha se këto raste janë momente të mira për të përkujtuar dëshmorët, pishtarët e lirisë, por edhe për të rikujtuar se kemi obligime dhe detyra që duhet t’i kryejmë. Shkolla jonë po reformohet nga një shkollë e informatave në shkollë të dijes , andaj është kënaqësi e veçantë që këto raste të shfrytëzohen për të shpalosur sukseset, arritjet dhe rezultatet e nxënësve dhe të mësimdhënësve. Në emër të familjeve të dëshmorëve të pranishmit i përshëndeti dhe i falënderoi Naim Zhitia vëllai i Afrim Zhitisë.