Milazim Kadriu: U bë përurimi i librit ''Melodi jete'' i Naim Selmanit

U BË PËRURIMI I LIBRIT “MELODI JETE” I NAIM SELMANIT

Nga Milazim KADRIU

Në ambientet e shkollës “Shaban Shala” në Besianë në organizim të Qendrës për kulturë u bë përurimi i librit “Melodi jete” të autorit Naim Selmani. Fillimisht për të pranishmit ku kishte nxënës, mësimdhënës dhe njerëz tjerë të kulturës dhe artit një fjalë rasti e mbajti Nexhmi Balaj,drejtor i DKRS. Ai tha se  Drejtoria e kulturës në vazhdimësi është duke i kushtuar një rëndësi të veçantë librit, si në botime ashtu edhe në promovimin e tij. Për lexuesin deri  më tash kemi botuar 40 libra dhe kemi organizuar Simpoziume  shkencore, dy panaire të botuesve të librit, kemi qenë kështu një urë lidhëse mes lexuesit dhe autorit. Në emër të nikoqirit përshëndeti drejtori i shkollës Skënder Gashi, i cili falënderoi që ishte zgjedhur shkolla “Shaban Shala” për përurimin e këtij libri. Redaktori i librit Imer Topanica tha se  parimisht, s’ka  asgjë  më  utilitare  dhe  që  i  ofrohet  filozofisë  utilitariste  të  dulce et utile (kënaqësisë  dhe  dobisë), sesa  t’i  japësh  një  vepër  artistike  botës  infantile, respektivisht  botës  së  fëmijës. Nisur  nga  kjo, mund  të  na  kujtohet  aty  këtu, ndonjë  mendim  i  ndonjë  personaliteti, për  rëndësinë  dhe  vlerën  e  artistit  në  një  rreth  shoqëror. Thënie  të  tilla  mund  të  hasim  shumë. Por  në  këtë  rast   neve  mund  të na  bie  ndërmend  ndonjë  shembull  sa  për  ilustrim, për  ta  forcuar  rëndësinë  dhe  pozitën  e  shkrimtarit  në  kuptimin  vlerësues, në  shoqëri, dhe  ky  shembull  mund  të  jetë, krahasimi  i  shkrimtarit / poetit  me  ushtarin. Ushtari  dhe shkrimtari /poeti, gjithnjë  kanë  pasur  mision  të  ngjashëm  për  shoqërinë  e  tyre, dallimi  ka  qenë  vetëm  në  armët  që  kanë  zgjedhur  e  ndonjëherë  edhe   këto janë  përzier, siç  është  edhe  rasti  i  autorit  të  këtij  libri  të  cilin  po  e promovojmë  sot. Ai  dy  herë  ka  sprovuar  veten  përpara  detyrave  ndaj  atdheut, një  herë  me  armë  zjarri  dhe  herën tjetër  me penë. Prandaj  t’i  kthehemi  librit  të  tij, shkaku  për  të  cilin  edhe  jemi  mbledhur  sot...

Topanica tha se Libri i  Naim  Selmanit  “Melodi jete”  hapet para lexuesit si një frymë subjektive e ligjërimit, poetizimit; rrafsh ky që jep modelin e poezisë lirike dhe lirizmin si gjini respektivisht si zhanër letrar. Topanica më tej  duke  ju  referuar  një  thënie  të  Oskar Ëild  se: “Arti  kurrë  nuk  duhet  të  përpiqet  të  bëhet  popullor  por  populli  duhet  të  përpiqet  të  bëhet  artistik!” ,  tha se mund  ta  kuptojmë  misionin  e  lartë  etik  që  ka  në  këtë  rast  poeti  për  fëmijë, kur  merr  guximin  të  flas  me  fëmijët  me  gjuhën  e  poezisë. Kjo  sepse  artisti  dëshiron  të  kontribuoj  sadopak  në integrimin  kulturor  të  brezit  të  ri  shoqëror, duke  ua  pasuruar  raftet  e  shkollave  dhe  bibliotekave  për  fëmijë  me një  libër  të  bukur  si  ky  që  kemi  sot  në  duart  tona, por  edhe  duke i  ofruar  sado  pak  me  natyrën e  artit, duke i ofruar  me  kulturën  e  leximit  si  një  nocion  nga  rrafshi i  shkencave  pedagogjike, arsimore  etj.

Më pas disa nxënës para të pranishmeve recituan vjersha nga krijimtaria e tyre,ndërsa katër piktor të rinj(nxënës) gjatë asaj kohe ilustruan nga nj poezi të librit të Selmanit. Në fund autori duke falënderuar të pranishmit premtoi se në rrugën e tij krijuese nuk do të ndalet dhe së shpejti para lexuesve do të vjen me një libër të ri. Për bibliotekat e dy shkollave “Shaban Shala” dhe Naim Frasheri” autori dhuroi disa ekzemplar të librit të tij.