Poezi nga Engjëll Koliqi

Engjëll Koliqi

 

 

I BESOJ DASHURISË

 

Edhe në ditë të vështira

Nuk i lëshoj

Binarët e optimizmit

Dhe besoj

Në një dashuri t’amshuar

Që edhe nën hije

Edhe e shkelur nga të gjitha anët

Mbijeton

Dhe historinë pasuron

!!!

                        Garlate (Lecco), 17 maj 2010

 

ME KËNGË

 

E kam nisur

Dhe dua ta mbaroj

Ditën e madhe të historisë

Zotin ta falënderoj

Historinë ta pasuroj

Shpirtin ta ëmbëlsoj

...

                        Garlate (Lecco), 17 maj 2010

 

NDËRMJET KLANEVE

 

Një projekt shqyrtojnë

-

Dikush thotë

Është i dashurisë

Të tjerët ndjejnë

Erë interesesh

Assesi t’ia dalin

T’ia caktojnë drejtimin

As ta vulosin realizimin

-

Dhe unë

Marr guximin

Të them se jemi

Në stinë fërkimesh

                        Garlate (Lecco), 17 maj 2010

 

NË ZEMËR TË SUKSESIT

 

Më t’ëmbël se mjaltin

E shijoj puthjen e urimit

Të së lumes mbretëreshë

E marr në dorë historinë

Dhe nisem drejt amshimit

                        Garlate (Lecco), 17 maj 2010

 

VIT PAS VITI...

 

Shumëçka kemi provuar

Deri në prag të  vdekjes

Kemi vuajtur

Por gjithmonë

Kemi qenë të lidhur

Dhe jemi farkuar

Me dashuri

Do të vazhdojmë

Deri në amshim

                        Garlate (Lecco), 17 maj 2010

 

NDËRMJET FLOKËVE

 

Në t’ëmbëlat momente

Të përjetimit të dashurisë

Dridhjet u shndërruan

Në këngë

Behari hapi epokë të re

Mua dhe mbretëreshën

Na kurorëzoi

Në fronin e dashurisë

Tani po vlon festa

Amshimi po na buzëqeshë

Dhe po hapë krahët

Të na përqafojë

                        Garlate (Lecco), 17 maj 2010

 

NDËRGJEGJEVRARË

 

Në vallen e parë

Mbasi kishte përmbushur krimet

Deri në tragjedi

Shihej i lodhur

I dridhej trupi

Bile edhe shpirti

Ishte zhytur

Në njëfarë errësire shpirtërore

Me zemrën duke qarë

Ndërgjegjevrarë

Vdekjen e vet duke e parë

...

                        Garlate (Lecco), 18 maj 2010

 

KËNGËT E MIA

 

Në strofën e parë

Të këngës së parë

Nga goja më dilte

Vetëm dashuri

Në të dytën

Në të tretën

Në refren

...

E tërë kënga ime

E para

E dyta

...

Të githa këngët

E tërë festa

Të gjitha ëndërrat e mia

Dhe aspiratat

Me dashuri mbushur

Dashuri riprodhojnë

Botën gëzojnë

...

                        Garlate (Lecco), 18 maj 2010

 

NË MBROJTJE...

 

Mbi kokën time

Të harruar nga zotërat

Çadra dashurie

Do të vëj

Sepse

Përfundimisht

Duhet shpëtuar

Nga stuhia e rrezikshme

E gënjeshtrave

Për intereset

Pa interese

                        Garlate (Lecco), 18 maj 2010

 

SIPAS KONTRATËS

 

Megjithë joshjet

Dhe intereset

...

Megjithë fitimet

Dhe pësimet

-

Duhet mbajtur

Binarët e dashurisë

Deri në amshim

Në të dy anët

-

Përpara!

                        Garlate (Lecco), 18 maj 2010

 

MBAS URDHËRIT

 

Pa mundësi të tjera

Të hapsirave të hamendjeve

Ishim të detyruar

Të fillojmë me realizimin

Pa marrë parasysh

Se prekë apo jo

Intereset e qenies sonë

Dhe të dashurisë

...

                        Garlate (Lecco), 18 maj 2010

 

NË HAPJE TË...

 

Në hapje të kremtes

Bujshëm kanë ardhur

Edhe ata që vetëm kanë shkatërruar

 

Në hapje të këngës

Kanë lëshuar zëra të çuditshëm

Edhe ata që kurrë s’kanë kënduar

 

Në hapje të valles

Kanë ngritur këmbët dhe krahët

Edhe ata që kurrë s’kanë vallëzuar

 

Në hapje të epokës së dashurisë

Kanë kërkuar fronin

Edhe ata që kurrë s’kanë mbretëruar

...

                        Garlate (Lecco), 18 maj 2010

 

KUR UNË THEM PO!

 

Gjithçka është e qartë

Shumë hapsira janë inspektuar

Shumë rrethana janë studjuar

Dhe kam arritur në përfundim

Se e tërë e vërteta

Dhe realiteti

Varen degëve të lisit të dashurisë

-

Pra

Në të gjitha formulat

Gjithçka është e barabartë me dashuri!

                        Garlate (Lecco), 18 maj 2010

 

GËZIM’ I DASHURISË

 

Në çdo kënd

Të shpirtit tim

Në këtë ditë të madhe

Ka dritë

Gëzim

Lumturi

Duke falënderuar dashurinë

                        Garlate (Lecco), 18 maj 2010