Kulturë
Besim Perjuci: Klithjet e moshave të mia
E shtune, 24.05.2014, 04:53 PM
Shkruan: Besim Perjuci
/Cikli: Përkushtime. Nga përmbledhja poetike
”Klithjet e moshave të mia”/
FJALË NË VARGJE ZOGUT QË ZBRITI BJESHKËN-AZEMSHKRELÇE
/Në pëvjetorin 17 të vdekjes së shkrimtarit, poetit,eseistit, dramaturgut dhe intelektualit me kolorit origjinaliteti të kristalizuar - Azem Shkreli, me mbetje të gjithmonshme në arkivin e biografive të krijuesve të mëdhenj/
Pa zbritur mirë rrafshit me vete
Mbaje aromën e rrëshirrës së pishakut plak
Doje t’na tregoje për pishën dhe aromëpishën e gjakut
Që e mbolli malsorçe babagjyshi në lindjen tënde.
Me puhinë e freskët të bjeshkës
solle qumështin e rreshkët të tbaneve
për ta ruajtur ëndrrën mbështjell në kujtim t’agimeve të bleruara.
Këngët për shkrepat me thepa për bjeshkëshpatijet
Si rreze e zemrës të digjeshin ballit
Dhe i recitoje migjeniane si të pakënduara.
Pastaj edhe këngët për pranverat e vonshme
I mbërtheje në vete për të shpërthyer aty
Ku nise dashurinë e parë shkollore.
Këndove së bashku me bjeshkën e gjyshit
Shkrove vargje e poezi
Për shallqefinin e stërgjyshit
Bëre dashuri tbaneve me syrin pishë
Fyelli yt edhe sot këngën s’e pushon ta dish.
E ujëakulli lëvizë bjeshkës
Freskut agimor fillon këngën e jetës
Me vete bart qëndresën e lashtësisë
Fryma jote malsorçe përkund ëndrrën
Shpresën.
Ti nuk e ndryshove kurrë vetveten
Rrënjën e padukshme të drurit
Që mbolli gjyshi e solle me veten
Rrënjën t’ua tregosh pasaardhësve më vonë
/Sa/ e pastër peshon - kjo rrënja jonë.
Edhe ujkun e kishe mësuar
Ta dojë sojin e njeriut – me dashuri amësim
Prej nga e more kaq shtruar Prej nga e mësove i nderuari im?!
Lumin e Bardhë ndër duar e peshoje
Jeta të rrjedhë brenda hodutit brigjeve tona Ti përherë këte e doje
Kohën e shqipeve e mbaje gjallë si fjal’n e burrit
E zemra jote e madhe rrahu shkrepave,grykave, gurit
Prometheun kurrë s’e kam parë- dritën magji
Nga Ti e kam marrë
“Gjaku im, që nuk shterët”.
Ti peizazh i urtësisë që rrahë për të prekur bukurinë e jetës
Ti ishe dhe mbete ushqim i kësaj fushe të etur
Ti ndërtove kulla të reja me fjalën Azemshkrelçe
Mbi plagët e Dheut shkëmbmalsorçe.
Shkruan Besim Perjuci
/Cikli: Përkushtime. Nga përmbledhja poetike
”Klithjet e moshave të mia”/
VETËM LINDJET TUAJA I KEMI SHËNIM
“Rrëfimi
në kohën e mashtrimit të madh, pa këputje nga kujtesa
djemve tanë Ali, Qamil dhe Astrit Spahisë”
Autori
Prilli me pranverën e djegur
Çdo vit e shkuar vitit
Dërmohet në shkrumin e kujtesës
Vertikalja nuk mund të qëndrojë
Mbi copëza ëndrrash të largëta
Fjala dhe gjuha memece
Shkëputën dhe ndrydhen
Në mbrendësi
Gjakun dhe Pranverën e Prillit ‘999
Që ta ruajnë deri në pafundësi.
Dënesjet dhe lëndimet
Në heshtje bëjnë
Dhimbje kronike.
Përmbrenda kohës së shëmtuar
Të zë mallkimi i fatit në pritje
Dhe gurëzohet në gjëmë.
Çdo ditë zemrës
I kohëzohet Prilli ndër ethe
Ashtu si bredhë ndër ne pikëllimi.
2.
Sekush trokiti, bëri rrëmujë
E thirri:-Nuk dihet!!!
Jeta apo vdekja
Sekush briti aq thekshëm
E tha:- Pranvera mortore ia behu
Me korbat e races së harxhuar
Mos harro,
Kurrë mos harro, biro
Djepin e lindjeve të ndrydhura
Dhe gjakun fisnik të tokëzuar.
3.
Sa herë zgjohet
Malli im i pafjetur
Sikur
sërish
Me motin e gjakut
Kohëve të vrazhdta
Për ta dërtuar Prillin tuaj
‘999 në brez të këputur.
4.
Në damarët e moçëm
Të Tokës së Kuqe
Rrugëton jeta e prangosur
Të gjitha dashuritë jetime
Varrosën pa asnjë fjalë
Në pragun e sh’pisë së kafshuar
Mbesin numrat pa emra.
5.
Në shtëpi e ku tjetër
Terraces betonarme
Akull të rreshtuar pakuptimisht
I nxorën me shpinë kah përendimi
Në arenën e prehjes
Në aneks të vdekjes
Ngjyrat blu të kohëzezës qyqare
Prapa shpinës
Caktojnë për ta rrugën e ferrit
Në pritje të plumbit
Koha vdes e ligështohet
Koha shtëron në pakuptimësi
Atëherë çdo plagë flet
Për më shumë vdekje.
6.
Vitet tona
Këtu po ndaheshin lodhshëm
Shëmbëshin dëshirat
Me lotin në sosje
Me lumin e jetës në etje
Që kjo Tokë e Kuqe
Të mbetet e thatë
Me djepin e lindjeve të këputura
Me puthjet e fundit mbi ballin lartë
Me lulët e sosura
Fati ynë i vrarë.
7.
Ora e Madhe në dhomën e vjetër
Ku bënim gjumë fëmijërie
Ndalon përballë shpendkeqës
Për ta kafshuar e kuqja kohën
E lëndimi rritet pa mëshirë
Frymëmarrjen shtrëngon
Mbi gjakun rinor të ngjizur.
Atëherë
Dritat tinëzisht
Bëjnë ërrësirën
Dhe në heshtjen e kafshuar të motit
Shikimi u mbetet peng
Mureve të oborrit kah Hyrja e Madhe
Pasardhësit do t’ju thërrasin zëshëm.
8.
Çdo të nesërme e ndalojmë
Për të endur shpresën zemrës
Që të mos mbeten të huaj
Që të mos harrohen lindjet e brezave kurrë.
Sepse origjinën nuk e kemi falas
As hua karpateve të largëta s’e morëm
Ajo është gjeografikuar lashtësive
Përtej shekujve të lënduar idhnak.
9.
Prilli përsëri e dogj Pranverën e sivjeme
Brazduar në përqafim të bardhësive
Për ta ruajtur me krenari kujtimin
Sa herë që merr udhën këndejpari
Numri ‘999 ecë
Mbi dhembjet tona.
10.
Aman, o Zot,
Përse e shndërrove dashurinë njerëzore
Në lot, dënesje e rënkim?!
Ata që erdhën
Nuk deshën t’i përfillin urdhërat e gjithnjerëzorës
Rebelë, paramilitarë paranoikë
Ushtri me surrat lugetërish
U përplasën aligatorçe
Mbi lindjet tona
Dhe vranë pandalshëm
Me virusin e vdekjes që sollën bishat pa origjinë
E bota bënte sërish sehir.
11.
Me fjalën e Zotit
Endet malli i pafjetur i shpirtit
Dhe bën epitafin:-
Kujtesa as mbyllet, as sosët
Këtu gdhendet guximi dhe e vërteta
Që kohë e sërishme e brezave
Të shënojë mbetjen historike.
12.
Tash diku larg në qetësi
E pathëna përkthelë kujtimet e ndrydhura
Në Fushat e Pikëllimit
Aty, ku pati filluar rrëfimi dinak
Trazuar nga koha e mashtrimit
Qindravjeçarë
Aty, ku heshtja
Edhe në qetësi rritet
Për të shëmb kohën mall
Pikëllimi mbetet pas nesh
Deri vonë – Gjakovë…
13.
Vdekjenuri juaj shndërruar në akull
Kristalizohet pafajshëm
Në buzëqeshjet jetime
Të pasardhësve në lindje.
Shehid kalvareve të jetës
Aty në Pranverën e Prillit të përgjakur
Strehimin e parë dhe të fundit e gjetën
Hidhërimi bredhë kudo mes nesh.
14.
Rrugët mbesin të nemitura
Hartohen mbrenda vetes
Dhe Fushave të Jakovës dergjen
Në qetësi
U flet dhembja e plazmuar në prishje
Mbi peshën e një kohe ndryshe.
15.
O, loti ynë në sosje
Na kthe dritën e ditën
Që të mos e kafshojmë më jetën
Në ecje kah lindja dhe kudo
Ta shërojmë kujtesën.
Portreti i tyre
Përjetë i gjallë të mbetet.
16.
Shpresat e vesuara agimeve të vonuara
Malli i shpirtit në ardhje
Brazduar shtigjeve të jetës
Për çdo ditë do të shndërrohen
Me fuqinë e lindjeve të reja
Që ta bëjmë të përditshëm
Portretin e tyre si lindje dielli
Që rrëfimi të mos mbyllet kurrë
Sepse dera e shtëpisë do të rri
Përjetë hapur
Do të jemi gjithmonë më shumë.