Mendime
Ardian Ramadani: Kufijtë e ardhshëm të Evropës..
E enjte, 04.04.2013, 07:51 PM
Kufijtë e ardhshëm të Evropës..
Nga Ardian Ramadani
Duke lexuar librin e bukur të
ish komisionerit të lartë për zgjerim Oli Ren « Kufijtë e ardhshëm të
Evropës » impresionohesh me argumentet, stilin dhe penën e tij bindëse dhe
tejet të mprehtë. Autori nuk bie na grackën e euroskeptikëve që parashohin
linja mazhino (kufizuese) për anëtarët aspiruese. Ai thekson rëndësinë e
aderimit të shteteve të reja në kuadër të kësaj organizate, por kuptohet duke
plotësuar një sërë kushtesh dhe kriteresh. Duke potencuar thënien e ish
presidentit francez Zhak Shirak se « Krijimi i Evopës është art. Një art i
së mundurës », autori mëton të paraqesë këtë mundësi të ndërtimit të Evropës
ashtu siç në fakt ajo do të duhej të ishte, e plotë dhe e tërë, duke
funksionuar jo në bazë të ekskluzivitetit dhe përjashtueshmërisë, por unitetit
dhe plotshmërisë. Autori parasheh 4 kufinj të ardhshëm të Evropës :
1. Transformimin e pakryer të saj duke dashur të theksojë impenjimin dhe
persistencën e tij për të pranuar edhe më tej anëtarë të reja.
2. Rindërtimin e besimit ekonomik, e gjithë kjo duke pasur parasysh që edhe
qëllimi fillestar i krijimit të kësaj organizate ishte në thelb ekonomik
3. Evropë që funksionon mirë, respektivisht ringjallje politike të Evropës,
duke marrë si shkas JO në kushtetuese franceze dhe holandeze.
4. Ndërtimin e koncensusit për zgjerim dhe hapjen e saj, duke potencuar se
Evropa duhet të jetë e hapur për shtetet e reja, duke krahasuar rastin me SHBA,
që sipas tij nuk mund të imagjinohej ky shtet, pra SHBA në momentin kur shpalli
pavarësinë, po të limitohej vetëm në 13 shtetet e saja të athershme.
Autori Oli Ren lëshon
kushtrimin e tij kumbues që bën thirrje për anëtarësim dhe zgjerim të Evropës
drejt lindjes, duke mos u pajtuar me zhgënjimin dhe burokracinë e Brukselit, si
dhe me refuzimin që i bëhet shteteve të caktuara. Ai potencon dhe kritikon thënien
e ish kryeministrit të Luksemburgut Zhan Klod Junker: « më parë raketat
nga Lindja ishin të kthyer drejt nesh dhe shfaqnin kërcënim, tani shpresat e
Lindjes janë drejtuar kah ne dhe na shfaqen edhe më tmerruese.
Oli Ren duke kërkuar bashkim më
të fuqishëm të Evropës, potencon edhe një fakt tjetër atë se UE arriti suksesin e saj me monedhën e
përbashkët, por kjo nuk duhet të ekzaltojë institucionet dhe zyrtarët. Edhe pse
me euron secili evropian ka një pjesë të Evropës në xhep (R. Prodi) ai kërkon
strategji dhe përkushtim më të madh për një sukses më të madh drejt politikave
koncensuale dhe efiçience më të madhe. Oli Ren i zhgënjyer tej mase me
refuzimin francez dhe holandez thekson thënien e Adenauerit « Historia e
botës është gjithashtu përmbledhje e asaj që do të mund të shmangej »
andaj me këtë mundohet të bindë lexuesn se ka mundur të evitohen JO të franceze dhe holandeze.
Duke bërë krahasimin me SHBA të,
Oli Ren përmend shifrën për atë kohë kur është shkruar libri, pra më 2007, se
Evropa kishte 430 milionë shërbyes të telefonisë mobile, ndërsa në SHBA kishte
200 milionë sish, dhe kjo sipas tij flet për fuqinë e Evropës. Poashtu sipas
tij Evropa duhet të finansojë edhe mjetet për hulumtime të ndryshme duke marrë
si shembull Kinën që shpenzon secilin vit 20 % nga mjetet e saj buxhetore për
hulumtime.
Sipas Oli Renit, Evropa edhe
pse është krijuar duhet të krijohen evropianët, (me gjasa merr thënien e
Mancinit më 1860, Italinë e krijuam tani le t`i krijojmë italianët). E krijimi
i evropianëve ka sfida dhe vështirësi, por jo edhe të patejkalueshme. Sipas ish
komisionerit Ren, krijimi i tyre bëhet duke folur me zë të ulët si dhe duke bërë
reforma të mëdha, e jo aktualisht siç ndodh me zërat kumbues e shurdhues në
njërën anë, e në anën tjetër me reformat gojore dhe sipërfaqësore ala bruxelloise.
Oli Ren në familjen e madhe
evropiane don të shoh edhe vendet e Ballkanit që prodhojnë shumë histori e nuk
konsumojnë asgjë prej saj. Pas zgjidhjes së një sërë problemeve duhet që sipas
tij, edhe ky rajon të marrë vendin e merituar.
Oli Ren impenjimin e tij
kryesor ka futjen e Turqisë në UE. E gjithë kjo ngase ky vend është me të vërtetë
atraksion dhe shembëlltyrë për shtetet tjera, duke arritur të tejkalojë vështirësi
dhe sfida që rrallë kush prej shteteve evropiane do t`i tejkalonte. Sipas Oli
Renit një shtet si Turqia ka vendin në familjen evropiane. Sipas tij është me të
vërtetë shembull i mirë dhe i pashoq rasti i Kajzerit të Turqisë, me 2350
hektarë, i cili më 2004 hyri në librin e Ginisit të rekordeve me 139 kompani që
u hapën vetëm për një ditë. Kësisoj një fuqi e tillë ekonomike si Turqia do të
ishte mëkat të qëndronte jashtë UE së.
Sipas tij Evropa që të ketë
glorifikimin e saj, duhet të shmangë mekanizmat frenues, të evitojë pikat
ekstreme të saja që aktualisht janë 70 ° në Veri, 22 ° në Jug, 63 ° në Perëndim
dhe 56 ° në Lindje, duhet të stimulojë
mekanizmat këshillues dhe lehtësues, që nënkuptojnë jo shkelje të rregullave dhe kushteve, por një
ofrim dhe mbështetje për shtetet aspirante, duke i inkurajuar dhe jo
dekurajuar, që me të vërtetë të shndërrohet edhe Evropa në një art të së mundurës,
e une do të shtoja në art të së mundurës dhe art i patjetërsueshëm dhe i
domosdoshëm.
(Autori është profesor i gjuhës dhe letërsisë frënge, magjistër i diplomacisë dhe shkencave politike, si dhe opinionist dhe kolumnist i rregullt)