Jahja Drançolli: Como, një qytet me një traditë të pasur historike dhe kulturore!

Como, një qytet me një traditë të pasur historike dhe kulturore!

Bukuritë e rralla të qytetit dhe Liqenit të Como-s në ditët e para të pranverës (Itali)!

Nga Jahja Drançolli

Një nga aspektet më të rëndësishme të historisë së  Como-s (Komo-s) është kultura Golasecca (shekujt 9-4 p.e.s.). Kjo popullsi përfaqëson një shembull domethënës të Epokës së Vonë të Bronzit dhe Epokës së Hershme të Hekurit në Italinë veriore. Gjurmë e kësaj kulture janë gjetur edhe në Parkun Spina Verde, pyjet përreth Como-s.

Në fillim të shekullit të 4-të p.e.s., pushtimi galian shkaktoi rënien e ngadaltë të Como-s dhe zonave përreth.

Disa shekuj më vonë, Como përjetoi një periudhë të re rritjeje brenda Perandorisë Romake. Disa gjurmë të kësaj periudhe përfshijnë banjat romake. Në vitin 196 p.e.s., zonat e pushtuara nga galët dhe Como-ja u bënë pjesë e Perandorisë Romake. Në vitin 59 p.e.s., Jul Cezari rimorri kënetën pranë skajit jugor të liqenit, duke çuar në themelimin e Novum Comum.

Më pas, Mbretëria e Lombardëve luajti një rol të spikatur në historinë e Como-s. Midis viteve 568 dhe 569 para Krishtit, Lombardët themeluan një mbretëri të pavarur që e zgjeroi me shpejtësi kontrollin e saj mbi pjesën më të madhe të gadishullit italian.

Në vitin 1127, pas një lufte dhjetëvjeçare kundër Milanos që rezultoi në shkatërrimin e plotë të qytetit, Como-ja humbi dominimin e saj, vetëm për ta rifituar atë falë Frederick Barbarossa-s, Perandorit të Shenjtë Romak. Barbarossa rindërtoi dhe zgjeroi muret mbrojtëse që mbronin qytetin dhe gjithashtu restauroi Castel Baradello-n, një fortifikim ushtarak të vendosur në kodrën parahistorike në Parkun Spina Verde. Më pas, kullat imponuese të Porta Torre, San Vitale dhe Porta Nuova u ngritën për të mbrojtur hyrjen kryesore të qytetit.

Rreth vitit 1700, fisnikët dhe intelektualët europianë nisën fenomenin e njohur si "Grand Tour", një udhëtim nëpër Europë që synonte rritjen e njohurive të tyre. Në vitin 1714, territori u pushtua nga austriakët dhe lindi Mbretëria e Lombardisë-Veneto-s, por në vitin 1859 mbërritja e Giuseppe Garibaldi-t e çliroi qytetin nga austriakët dhe Como u bë pjesë e Mbretërisë së sapoformuar të Italisë.