Ndue Ukaj me libër të ri: 'Mund të jetë si në fillimet e kohëve'

Shkrimtari Ndue Ukaj ka kënaqësinë të njoftojë botimin e librit të tij më të ri me poezi, “Mund të jetë si në fillimet e kohëve”, nga Shtëpia Botuese “Onufri”.

Ai shpreh mirënjohjen e tij ndaj Anton Berishajt, Elsa Skënderit dhe Kadia Dedjajt, që lexuan dorëshkrimin dhe, me sugjerimet e tyre të çmuara, e pasuruan atë. Falenderon gjithashtu Bujar dhe Enxhi Hudhrin për realizimin kaq të bukur të këtij libri.

Librin e gjeni në Panairin Kombëtar të Librit që fillon më 12 nëntor.

Ndue Ukaj:

Mund të jetë si në fillimet e kohëve

Sot është ditë e re dhe mund të jetë

si në fillimet e kohëve.

Qielli është i kthjellët si një stinë e hareshme,

ku rrëshqasin sytë e tu kërkimtarë.

Ti mos lejo askënd ta ngulfatë bulëzimin e zemrës sate.

Qielli është i bukur si një enë e mbushur lumturi

dhe kujto se vetëm zemrat e bulëzuara japin jetë.

Ky mëngjes i bardhë si bora

është çast kur sytë duhet të lirohen

nga imazhet e shkretuara,

nga ëndrrat e zeza

dhe të ecin ditës së re me mendime të reja.

Dhe në një ditë të re

mund të futesh në një kopsht të bukur,

ku gjithçka mund të kthehet në pranverë,

duke ta kujtuar se dielli

përherë gjen të çarat nëpër mjegull

dhe të prek,

dhe të prek butësisht,

dhe të prek ëmbëlsisht,

si duart e një dashurie përvëluese.

Se një ditë e re është njëlloj përsëdytje e krijimit,

ku ti mund të krijosh gjithçka të bukur,

gjithçka të bukur që nuk ka ndodhur kurrë më parë

dhe nuk ka mundësi të përsëritet kurrë më si atë ditë.