Kadri Tarelli: Kristaq Turtulli dhe 'Pianisti'

Është vlerë të jesh i zgjuar, është vlerë të jesh i suksesshëm në jetë, të kesh pamje të hijshme e serioze. Është vlerë të jesh udhëheqës i ndershëm. Numërohen shumë vlera në këtë botë, por me mirësinë nuk krahasohet dot asnjëra - Kopi Kyçyku

KRISTAQ TURTULLI dhe “PIANISTI”

Mbresa e përjetime

Nga Kadri Tarelli

Më pëlqen muzika, por i anashkaloj krijuesit dhe biografitë e tyre. Edhe për artistët, kujdesem pak që të mësoj të fshehtat e jetës së tyre të trazuar. Më shijon arti, krijimtaria letrare, muzikore dhe pamore, ndaj i vlerësoj ata edhe për shpirtin rebel. Thjesht dëgjoj muzikë, madje edhe kur lexoj, apo marr mundimin të shkruaj, e le në sfond me zë të ulët.

Dikush më tha gjeje dhe merre  librin “Pianisti”, (novela), të shkrimtarit e romancierit të njohur Kristaq Turtulli. Do kënaqesh....! Nuk u lodha shumë, pasi lehtësisht e gjeta në “Panairin e librit”, të organizuar në këto ditë nëntori 2013, në Tiranë.

Në ballinë, dy duar me gishtat nevrik, lozin mbi tastierën e pianos. E përfytyroja ndryshe: një zotëri i veshur me stilin klasik, e leshra të lëshuara e të shprishura, që i vareshin mbi ballë duke u lëkundur ashtu të ngatërruara, etj, etj. Më pëlqen edhe kështu, thjesht që godet në shenjë pa mëdyshje. Është një zgjidhje artistike mjaft e goditur, pamje e papërcaktuar nevrike, për të thënë atë çka gatuhet brenda nëpër rreshtat dhe faqet e shkrimit “Pianisti”, që i ka dhënë emrin edhe vetë librit.

Tregimi rrjedh natyrshëm, qetësisht, si ujët e lumit Vjosa në ditë të ngrohta të beharit. Më kishte marrë malli të lexoj e kujtoja shumë fjalë të përdorura kohë më parë në fjalorin tim, tani të “harruara” e të lëna mënjanë si të pavlera.

E gjitha nis me një telefonatë të largët, për një lajm të keq, për një person e histori të largët e të venitur nga vitet. E rrëfyer në vetë të parë, me një fjalor për t’u pasur zili, larg gjuhës standarde, duket sikur ngjarja është reale dhe përjetuar, siç mund t’i ndodhë çdokujt, pavarësisht se ku, në mëhallë, në fshat apo qytet.

Është një formë mjaft e gjetur e shkrimtarit rrëfimtar, që të bën ta çosh deri në fund këndimin, ta besosh e të kuvendosh, madje edhe të bëhesh ortak me heroin kryesor, “mësuesin e rusishtes”, për të shtuar diçka që ai s’e thotë, ose që qëllimisht e le si në mjegull.

Nuk ka nevojë të përshkruhet përmbajtja. Ç’ kuptim ka të ritregohet? Rreth tre personazheve vërtitet e gjitha. I pari Mësuesi i rusishtes, pastaj Belbani (më shumë duket si emër i pabukur, qëllimisht i sajuar) dhe më tej Poli, ose më gjatë Polikroni. Tipa krejt të ndryshëm të gjendur në një qytezë të vogël dhe të puqur rastësisht, ose mjeshtërisht nga autori. Çudi si mund ta gjejnë muhabetin mes tyre? Po kështu ndodh në jetë, mbase më shumë në provincë, ku s’ke ku përplasesh, veç tek klubi “Kuçi gota” dhe tek gota e rakisë, ose tek loja e bilardos, kur fatmirësisht gjendet një e tillë. Këto s’para ngacmojnë ndjesi, pasi duken si një sfond i zymtë i një pjese dramatike, që zhvillohet në një cep të botës dhe kaq.

Edhe pakënaqësia dhe shfryrjet e mësuesit të rusishtes, duken të ftohta, pavarësisht se janë pjesë e jetës shqiptare, të atyre mijëra mësuesve që dekada më parë u degdisën dhunshëm në zona të largëta, në emër të detyrës dhe s’u shpërblyen si duhet, por që nuk u ngulën të krijojnë rrënjë.

Nuk çudit njeri edhe Belbani, që me një kurs çfarëdo ishte përgjegjësi i shtëpisë së kulturës. Vallë vërtet s’kishte tjetër...!? Me një fjalë ishte emëruar drejtues i jetës artistike e kulturore të qytezës, ku kishte edhe një shkollë të mesme. Ishin të zakonshme të tilla ndodhi. Ndërsa ndryshe është Poli: i heshtur, elegant, i drejtë sikur ka përpirë okllai, do të shtonte ndonjë korçar shakaxhi.

Fshatar i çuditshëm ky, jo si të tjerët. I hekurosur, me jakën e këmishës të ngritur si fisnikët e hershëm, sqimatar dhe i kujdesshëm deri në vogëlsi, aq sa mos i prishej hekuri i pantallonave kur ulej diku. Asnjë fjalë, kush është e ç’ka në kokë. Enigmatik, sa bëhet i bezdisshëm me heshtjen e tij. Vjen në çdo fund jave në qytet dhe kaq.

Meritë e autorit që e le këndonjësin të hamendësojë dhe të pyesë: - More! Po ç’është ky fshatar, me pamje e veshje aristokrati, tamam si “dhia mes deleve”, që vjen e ikën si hije në jetë e rëndomtë të qytetit të vogël......!?

Lexon e këndon lexuesi, po pianisti s’po duket gjëkundi.

Jetën e qytezës e trazon Dodona, vajza e doktorit, studentja që me orë të tëra luan në piano në shtëpinë e kulturës. Thashethemet mbushin dynjanë, ushqimi shpirtëror për gratë, që s’kanë me se të merren dhe rrëmojnë plehun e botës, apo trazojnë hirin në vatrat e shtëpive të mëhallës. Dodona si në një shfaqje teatri, qëndron prapa perdes të vjetër e pangjyrë, apo mbledhur në një shtëllungë reje në ngjyrë të bardhë, që më së shumti bëhet gri, që endet në hapësirat qiellore pa kufi. Nuk duket në rrugica e as në qytet, nuk i a sheh kush fytyrën, ndërsa ndjehet çdo lëvizje e saj, çdo brengë, çdo psherëtimë, çdo lot i rrjedhur faqeve, madje edhe gjumi dhe frymëmarrja e mekur nga trishtimi. Dikujt i dhimbset, po të tjerët nuk e lenë në hallin e vet. Disa, sipas ligjeve të pashkruara të provincës, e shajnë, e mallkojnë, e dënojnë dhe ia nxijnë jetën.

Pikërisht në një çast pritje dhe padurimi shfaqet Poli “Pianist”. Habitet mësuesi i rusishtes, që më në fund e zbulon të fshehtën. Zemërohet Belbani, që doli në dritë mjeshtëria e Polit, mbase e dinte po nuk bënte zë. I ndjeshëm ndaj paaftësisë së vet, bëhet dru dhe gur. Ndoshta, është ai i paudhë, që i ka prerë rrugën artistit......? Këtu këndonjësi gjen shpjegim. Paraqitja dhe veshja e Polit nuk është rastësi.

Një fund brilant i tregimit. Autori ka një frymëzim, që të ngazëllen. Të bën ta jetosh me shpirt të trazuar atë skenë, aq sa bëhesh njësh me të. Nuk besoj se e ka sajuar. Lexojeni dhe do të bindeni. Më së shumti do të ndjeni kënaqësi të fjalës dhe rrëfimit të sinqertë.

Çdo këndonjësi, ashtu si mua, duke përjetuar fundin e magjishëm, vetiu i lindin shumë pyetje, të cilat kërkojnë të dalin nga gryka e thesit mbushur plot:

. Ç’e shtyu “Pianistin”, të mbyllet në vetvete e të ngujohet në një vend të humbur e të jetojë si asket?

. Mos vallë ndonjë dashuri e shkërmoqur në vorbullat e jetës, ashtu si e Dodonës? Mbase......! - Në novelë rrëfehet më pas, hollësisht.

. Më tej akoma: - Kaq e fortë qenka dashuria......!? - Këtu ndalemi......!

Vjen përgjigja: - Veç ai që e ka provuar prushin e saj, e di, e ndjen dhe e përjeton. Të tjerët hamendësojnë, rrëfejnë dhe shumë gënjejnë.......!

Kristaq! Urime dhe falënderim për këtë libër kaq të bukur!

Suksese miku im i shumënjohur në letrat shqipe, në shkrimtari, poezi dhe lojën e ngjyrave në pikturë! Presim të tjera botime me kaq vlerë.

Kadri Tarelli

Durrës më: 18, të vjeshtës së tretë, 2013.