Kastriot Dervishi: 37 vjet nga ekzekutimi makabër i Havzi Nelës

37 vjet nga ekzekutimi makabër i Havzi Nelës

Nga Kastriot Dervishi

Pas tre dënimesh dhe një internimi, Havzi Nela u ekzekutua me vdekje në litar nga Dega e Punëve të Brendshme Kukës në orën 3.30 të datës 10.8.1988, në sheshin e agjencisë së udhëtarëve të qytetit. Fjala e tij e fundit ishte:

“I keq kam qenë dhe ashtu po shkoj. Të këqijat e mia i mora me vete. Kërkoj që të afërmit e mi të trajtohen mirë, mos të merren nëpër këmbë. Kam 910 lekë dhe kërkoj që këto t’i jepen të afërmve të mi (nënës)”.

Ekzekutorët zgjodhën një metodë mizore për ta varrosur, qëndrimin vertikal të kufomës. Duke u nisur nga fakti se gjatë verës uji liqenit të Kukësit ishte më i pakët dhe tërhiqej në brendësi, zgjodhën si vendvarrimi hapësirën që në dimër do të ishte e përmbytur nga uji. Hoqën një shtyllë të hershme të mbetur nga qyteti i vjetër dhe në zbrazësinë e krijuar futën Havziun e vdekur, në mënyrë që koka të rrinte afër sipërfaqes. Duke e varrosur jo shumë thellë, ata kishin llogaritur që gjatë dimrit ujërat e Drinit jo vetëm do ta zbulonin, por do ta lëkundnin e më pas do ta shkulnin kafkën e Havziut nga vendi i varrimit për ta çuar në drejtim të rrjedhës së Drinit te hidrocentralet e më tutje në det.

Pesë vjet më vonë, kur u gjetën eshtrat e Havzi Nelës, si pasojë e kallëzimit të një polici pjesëmarrës në ekzekutim, u konstatua se skeletit i mungonte kafka.