Vahit Nasufi: Rapsodit Ali Krasniqi

RAPSODIT ALI KRASNIQI

Me rastin e njëvjetorit të ndarjes nga jeta

Nga Vahit Nasufi

Moj e dashur Kosova jonë,

Me ligjërime pse vajton?

Dhimbje t`madhe n`shpirt ndjeva,

Për rapsodin nga Malisheva!

Heshtën tingujt e sharkisë,

Që rrinte n`prehër t`bacë Alis,

Edhe këngët i la të shkreta,

Ali Krasniqi, u nda nga jeta!

Në dhjetor, më njëzetë e dy,

Të vitit dy mijë e njëzet e dy,

Fshati Drenoc me lot ndër sy,

Foklorit tone një krah iu thy!

Lindi n`Drenoc ky zemër stoik,

N`vitin 1939, më 15 korrik,

Nga nëna Nurë, babë Ramadani,

Lum për ne që e pat vatani.

Lindi në një familje bujare,

Shumë artdashëse, atdhetare,

Kishte katër motra, katër vëllezër,

Perëndia kështu kishte bërë emër.

Ishte i ndershëm si qytetar,

Me kulturë, karakter fetar,

Ishte shumë humanitar,

Ishte i njohur dhe si pleqnar…

Këndoi me shumë këngëtarë,

Me Is Llapçevën të pa ndarë,

Sali Bajramin kushëririn e vet,

Me vëllain Ferizin këndoi n`duet…

Këndoi n`festivale folklorike,

Këngë ashikishte dhe kreshnike,

Këndoi, n`koncerte humanitare,

Dhe n`shumë dasma familjare…

Më 1977, në Zagreb të Kroacisë,

Bashkë me rapsodin bacën Is,

Në festivalin ndërkombëtar,

U shpërblyen me vend të parë!

Thesari i veprave artistike,

I solli shumë çmime publike,

Shumë mirënjohe dhe shpërblime,

Që do të mbesin në kujtime.

Në përjetësi kur e çuan,

Të gjithë parajsën i dëshiruan,

Me kurorë lulesh e mbuluan,

Shumë referate i lexuan.

Ali Krasniqi, pusho i qetë,

Dheu që i këndove t`qoftë i lehtë,

Edhe pse pa ty ne kemi mbetur,

Ndërrove jetë, por, nuk ke vdekur!

Sa herë këngët do t`i dëgjojmë,

Ali Krasniqin do ta kujtojmë,

Veprat tua madhështore,

Do të mbajnë të gjallë prore.

Kërçovë, 22 dhjetor 2023