Kulturë
Ndue Dedaj: Në Brno, vendlindjen e Kunderës
E enjte, 13.07.2023, 07:55 PM
NË
BRNO, VENDLINDJEN E KUNDERËS
Nga
Ndue Dedaj
Në
vjeshtën e vitit Dy Mijë, u ndodhëm për tri ditë në Brno, qytetin e dytë çek
pas Pragës, që nuk di pse na përngjasonte me Shkodrën. Ishim një grup
arsimtarësh shqiptarë, të përfshirë në një projekt europian mbi demokracinë në
shkollë, ku më pas njëri nesh do të bëhej ministër i Arsimit i Shqipërisë.
Kishim
bërë 130 km nga Vjena me tren dhe ishte një përvojë e re qendrimi në këtë
qytet, emrin e të cilit nuk e shqiptonim lehtësisht për shkak të
bashkëtingëlloreve të fillimit. Sigurisht që nuk do të na priste Milan Kundera,
por një adash i tij, Milan Pol, ekspert i arsimit dhe profesor i Sociologjisë
në Universitetin Masaryk në Brno. Ishte kënaqësi të hyje nëpër shkolla, ku
nxënësit ngriheshin në këmbë dhe mësuesit e tregonin Shqipërinë, si vendin më
me shumë diell të Mesdheut.
Teksa
kundroja peizazhin çek, i ngjashëm jo pak me atë shqiptar, sillja ndërmend
skenat e përshkruara me aq ironi nga shkrimtari disident në romanin e tij
“Shakaja”, që ua kam rekokomanduar plot vetëve. Çekia, kryekrejet, do të shenjohej
nga shkrimtarët e saj të mëdhenj, pasi dihet jehona më parë e Franc Kafkës dhe
romanit të tij “Procesi”, ndonëse gjatë socializmit tonë të përbashkët lindor,
ne do të njihnim vetëm skodat çeke. Njerëzit me të cilët qendruam ato ditë në
Brno flisnim me adhurim për disidentët e vërtetë si Kundera dhe jo për
“disidencën” e tyre vetjake...
Në
qendër të Brnos ishte dhe një klub-restorant me shqiponjën kuq e zi i një
shqiptari nga Kosova, ku bëra këtë foto si kujtim.