Fatmire Duraku: Vasha me kike

Fatmire Duraku

Vasha me kike

Kot është të puthesh  zjarrin

Po të qe tërë akull zemra

Po të qe i ngrirë mendimi për lirinë

Liria është vetëm një vashë me kike

Një vashë me pranverë në sy

Në të cilët i ik katana e purpurt

Ta përjetosh lulen e lirisë

Patjetër duhet të kesh gjak në vete

Patjetër të kesh zjarr në gishta

në buzë në shikim në gjuhë

Të kesh zog në zemër kalli në sy

E po t`i kesh të gjitha do të thotë

se i je kthyer lirisë që e ke në vete

zjarr të lules në dritare

ja ky është i vetmi çast

që të mund ta kuptosh veten

se “Liria vjen nga zemra”