Kalosh Çeliku: Njëqind vjet larg Zgjimi

NJËQIND VJET LARG ZGJIMI

 

NGA KALOSH ÇELIKU

 

Jetës i shpalle luftë

 

Zonja Vdekje, kur na erdhi në Shtëpi

Ti, i dole para me lule në dorë:

Eja motër, kurrë nuk të kemi pasur frikë!

Fisi ynë të ka pritur edhe me pushkë

Nateditë i pagjumë në Shtëpi. Male.

 

Përgëzime! Koha erdhi, sot të të presim me Libër…

 

 

Heshtja Yte para Zonjës Vdekje

më thotë: Tradhëti

 

Përditë, heshtja Yte para Zonjës Vdekje

Sytë i hapë, më thotë: hape gojën!

Zonjës Vdekje, pse nuk ia përplas në sy

Se: Ti je Poet. Edhe, tradhëtar besnik.

Marrëzisht më do mua. Edhe, Zonjën Vdekje.

 

Ec e hape gojën, sot para kësaj pasqyre

Kur, ajo të përgjigjet: Edhe ti je i bukur?!

Megjithatë, më e bukur është: Zonja Vdekje…

 

 

Mikja Di ende me anije

nuk zbret në breg

 

Anijet nisen njëra pas tjetrës nga bregu

Unë e pres Anijen e Mikes Di!

Dallgët, që e përplasin nëpër shkëmbinj

E Ajo, ende nuk ka arritur në breg.

 

Anijet i pres dhe i përcjell me vite

E Mikja Di, ende nuk zbriti në breg…

 

 

Anijen Tënde në oqean

e hëngër peshkaqeni

 

Anijen Tënde, moti kohë

Neteditë e pres në det!

Sytë i humba në ujë. Dallgë

Njeri i gjallë nuk zbret në breg.

 

Imzot, mos anijen Tënde

Thellësive e hëngri peshkaqeni?!...

 

 

Qershia ime e fëmijërisë

lulëzon në varreza

 

Perçudi! Qershia ime e fëmijërisë

Sot, lulëzon në varreza.

Degët shtri krah më krah në Qiell

E rrënjët shtatë pash thellë në tokë.

 

Kokërrat e kuqe hedhur nëpër degë

I ngjallin të vdekurit nga varri…

 

 

Varri Yt rrëzë Çukës

e ka një çelës

 

Dyert e Shtëpisë, në Katund

Shul kishin. Reze. Edhe, çelës.

Hasmi mos na vrasë në gjumë

Nëpër dritare, nga shtrati i rrushit.

 

Varri Yt profet, rrëzë Çukës

Sot e ka një çelës të ndryshkur.

Dexhalli mos na hyjë edhe në varre…

 

 

Ne gërmojmë një varr

të hardhisë rrushit

 

Vetë i dyti: Unë dhe Ti

Ne, gërmojmë varrin e hardhisë rrushit.

Shportën e ka marrë Dexhalli

Ne, vetëm tinëz e mbushim gjirin.

 

Shi, nuk ka rënë këtë verë

Toka e thatë. Gur mbi gurë.

 

Ne, gërmojmë një varr të hardhisë

Populli e ka thënë moti:

Rrushi sheh rrushin. Dhe, piqet në Katund…

 

 

Unë jam lind e rritë Poet

nën hardhinë e rrushit

 

Edhe, thonë: dudumët nëpër Çarshi

Kalosh Çeliku është pijanec.

Prognozën psikologjike ma caktojnë debilët

Pevetëdije, se: Unë e njoh më së miri Veten.

Unë e pi rakinë. E jo, ajo mua dolli.

Shkaku se, lind jam dhe rritur në Dimër

Përpara Shtëpisë, nën hardhinë e rrushit.

 

Dudumë, pini çaj rusi me xhygymë

E Unë, përinat do të pi raki rrushi!

Veten do ta vras me dy shtamba verë nën Rrap…

 

 

Palapaçkat* e Mamit

 

Palapaçkat e Mamit m’i le porosi:

I duaj si kafshë shtëpiake!

Edhe, qasi në Shtëpi. Kopësht

Ushqim, jepu përditë. Përnatë!

 

Palapaçkat e Mamit i duaj marrëzisht

Unë jam mes tyre, në Kopësht. Shtëpi…

 

1. Pagëzim i maceve të vogëla.

 

I varrosur në Ty

një natë Dimri

 

Varri me libra ma hapi derën

Rrugë nuk kam për në male.

Babai ma mbylli portën, e më tha:

Liria është kurvë. Robëria, rrospi.

Bir, vargun sot fute në brez!

 

Unë dola përoxhaku në mal

Jo, si xixë zjarri mbi çati. Po, si Poet…

 

 

Njerëzit i shoh si bubrreca

Ecin nëpër tokë

 

Njerëzit i shoh si bubrreca

Ecin, zvarriten nëpër tokë.

Edhe, pse: nuk janë bubrreca

U pëlqen jeta e bubrrecave.

 

Imzot, njerëzit i shoh si bubrreca

Përçudi! Nuk kanë kokërr gruri në gojë…

 

 

Njëqind vjet larg Zgjimi

 

Gjumi zgjatë me shekuj

Qyqe oj, ma prish gjumin!

Ëndrra të këqia shoh Natën:

Dasëm. Nuse ma sjellin Xhadinë.

Ditën, nuk ka njeri të m’i hapë sytë.

 

Dexhalli me trumbeta e shalon kalin

Përinatë: Unë vargun në Libër.

 

Njëqind vjet larg, Zgjimi…