Mehmetali Rexhepi: Don Mikel Tarabulluzi

Don Mikel Tarabulluzi

 

Mehmetali Rexhepi

 

drapri vigan i një gjysmëhëne

ia korri kallinjtë

dhe të lashtat e fushës

assesi të mbjellat e Shën Jeronimit

assesi trurin

për të gdhendur gurin

 

*

Don Mikeli u ngjit këtu

pështymën t’ia lanin retë

lakadredhas me çelës

të kryqit në tru

 

*

Stublla nuk është Krujë

Kruja nuk është Stubëll

atje nuk është Gjergji në burbujë

këtu i zmadhohet një sumbull

 

*

Ajo sheh azurinën

e avujve të tretjes së shikimeve

ato të fismet e princërve

 

*

prore e avullt nga lartësia

shihet largësia

*

pirgu sogjetoi

kumti mungoi

në Muzeun e Gjergjit

shurdhërive të kambanës

ilahitë kalërojnë

 

*

në Stubëll kambana kumbon

deri te “Martirët e Karadakut”

dhe diaspora

për lutjet shqip të mëngjesit

 

*

vijmë e ngjitemi lart te ndërdyja

kjo përshpirteni e ka trazuar

kthehemi poshtë të ngopur me muzgun

me sedër të hibridizuar

lakminë e lehtë të ngrënies

duke  gromësuar

 

*

Don Mikel Tarabulluzi

e la arkitekturën e sedrës së vet

 

*

se si koncepti i zverdhjes

skuqet

shpërthen fuqinë e verës

dhjetëra sylynjarë

në shpirt më derdhen

jo si fond vere

as fillim vjeshte

as motive vjershe

 

*

gjethet e hibridit të ri

bien nga kjo lartësi

 

*

Stublla fsheh dishepullin

e ngjizjes së kërthizës

te “Agimi i gjytetnis”

 

*

bashkë me korin e bekuar

Hirësia e Tij Don Mikeli

dhe lutësit e mëkatuar

 

*

Imzot

mos na lërë

të biem në ferr

të katër sëpatave cirilike

ka a s’ka urata epike

mes Hirësisë Suaj e Perëndisë

le të ri firmoset kontrata e etnisë

 

*

në Stubëll hyri Krishti

dhe këmbëzën e djallit

nuk e shkrepi gishti