Ramiz Lushaj: Kush ia shkel syrin Hashim Thaçit?

KUSH PO IA SHKEL SYRIN HASHIM THAÇIT?!

NGA RAMIZ LUSHAJ

1.

Prej ditësh po lodron në Kosovë thania turrece sikur “dikush”(!) ia paska shkel syrin Hashim Thaçit për me u riciklue në pushtet (larg)koft edhe me “vota të vjedhuna”(!) Sigurisht, këto janë thaçmet e fundit të betejës politike të Thaçit, i cili prej nesrit do të jetë ish e ndoshta “ysh” kryeministër i Kosovës.

Gjithkahit u fishnue e u përhap fjala për fitore të Thaçit me nji hajni “me liçensë”(!) të pushtetit politik. Po kjo, në mënyrën e vet dhe në kohën e vet, u përgenjeshtrue haptas e qartë nga vet bota euro-atlantike. E, kësisoj, Thaçi është tue u (vet)rrgall e prrallë keqas në rrugën pakthim drejt e në opozitë.

2.

Kit’ të premte të fundit elektorale ambasadorja amerikane në Kosovë, Tracey Jacobson, në emisionin “Rubikon” të RTK, dijenoi se “SHBA nuk kanë asnjë preferencë për parti a lider në zgjedhjet e 8 qershorit”. Sigurisht as për partinë në pushtet, për LDK e për Thaçin. Për ma tepër, SHBA, kumton për politikën e Kosovës: “Ne kërkojmë vetëm zgjedhje të lira dhe demokratike”. Përndryshe, shkelqësia e saj, Jacobson, përtej të zakonshmes, me diplomaci të hapur, deklaron: “Nuk është e vërtetë se ne do t’iu tregojmë njerëzve se për këtë do të votojnë”. Gjithësesi i (ri)thot’ stop keqpërdorimit të “Kartës Amerikane” në Elektoriadën e Qershorit. Natyrisht ky mesazh ma shumë se i nevojshëm vlen edhe për Thaçin.

Ambasadorja amerikane, Jacobson, në qëndrimin e saj vargavijë nyjton faktin se SHBA dëshiron të bashkëpunoj me një qeveri “që nuk vjen nga vota e manipuluar” dhe “me një qeveri që merren vesh”. Midis rreshtave lexoj kështu: Kurrkush nuk mund të prekin shenjtërinë e votës të 8 Qershorit. Një qeveri si e Thaçit, e mbytur në korrupsion të egër, ajzberig, oktapod, nuk mundet e nuk duhet lejue kurrsesi që t’i marrin zgjedhjet me korupsion politik kurrfarë sojit, as ta kthejnë votën në biznes të ditës, as ta nxjerrin pushtetin në ankand mafioz. Miku i madh, i kahershëm e i përjetshëm i Shqiptarëve, senatori amerikan Eliot Engël, e përcjell nga Amerika mesazhin e tij “besoj që zgjedhjet do të jenë të lira, transparente dhe të drejta". Kjo është lutje, dëshirë e provë nga të gjithë e për të gjithë

E sa për të marrunit vesh po mendoj se dihet haptas, ballas. Është PDK, parti që “u  paralizua nga lufta ndërklanore” prej sherrnajës së korrupsionit, etj.  Përndryshe, do të thosha se PDK e skalitun si “parti civile e UÇK”-së po shkalafitet nga “thaçëri” e “kopukëri”, etj. E, tashti, më 8 qershor, ka me iu shterrë energjia e gjenerueshme, ka me i ra “automati elektoral”, ka me mbetë në opozitë zhagitëse, pasi ka nevojë për kurë demokratike e për një meny politike ma ndryshe.

3.

“Mbretëresha pa kurorë” e Europës së sotme, Angela Merkel, Kancelare e Gjermanisë, kryefuqisë europiane, njëherash kryetare e Unionit Kristiandemokrat Gjerman, më 6 maj, ia ka çue një letër mbështetëse kryetarit të LDK-së, Isa Mustafa, tue fol troç e botnisht: “Unë ju dëshiroj një rezultat të mirë në këto zgjedhje”. Pse thotë kështu? E shpjegon vet madhështia e saj, Merkel, ashtu shkurt, krejt qartë. E para: kumton se “LDK e ka fuqinë për t'i ndërmarrë hapat e nevojshëm dhe për të kontribuar zhvillimin pozitiv të Kosovës”, për të ecë në “rrugën e zhvillimit të qëndrueshëm ekonomik”, për hapjen e “vendeve të reja të punës”, për të krye “reforma energjike”, etj. E dyta, kjo tejet e randësishme: “Zonja e hekurt”, Merkel, e sheh LDK-në si të vetmen alternativë e perspektivë për integrimet euro-atlantike të Kosovës. Përndryshe, si e thekson thuktë e tekstualisht vet Merkel në letrën e saj: “integrimi i Kosovës në bashkësinë e shteteve europiane, është perspektiva e të ardhmes. LDK përfaqëson këtë perspektivë”.

Zëvendëskancelari e ministri i Financave i Austrisë, Mihael Shpindeleger, njëherash edhe kryetar i Partisë Popullore të Austrisë, më 4 qershor, i përcjell një letër kreut të LDK-së, Isa Mustafa. Ai përcakton dukshëm: “Kosova ka nevojë për më shumë ndryshime dinamike”. Kuptohet: kësisoj, ai shprehet se “beson fuqishëm” tek fitorja e LDK. Pse? Kjo për faktet se Isa Mustafa si kryeministër dhe Lidhja Demokratike e Kosovës në mazhorancë “kanë një program të shkëlqyer dhe idetë më të mira për reformat e nevojshme në Kosovë”. Dhe, tjetra, kjo tejet kryesore: “LDK-ja ka një traditë të gjatë dhe të suksesshme dhe një histori të besueshme, si themele të forta për reformat e nevojshme dhe progresin ekonomik”.

4.

Presidenti i Partive Popullore Evropiane, Xhozef Dol, nëpërmjet një letre mbështetëse për LDK  shprehimon bindje e siguri se kryetari i LDK-së, Isa Mustafa, do t'i fitojë zgjedhjet e së dielës për ta zhvilluar dhe integruar Kosovën në familjen evropiane, duke e cilësuar atë si “pasardhësi i denjë i presidentit Rugova”.

Akademiku Isa Mustafa, kandidatura e LDK-së për kryeministër pas 8 qershorit, duket se është i preferuar si i tillë edhe nga Perëndimi euro-atlantik. Dol, kreu i PPE, i ma të madhit formacion politik në Parlamentin Europian e prognozon liderin Mustafa: “Ju dini t’i tejkaloni ndasitë dhe betejat shterpë për të mbetur të bashkuar. Ju e keni kapacitetin për të dëgjuar dhe forcën për të bindur, gjë që ju bëjnë të jeni njeriu i duhur në vendin e duhur. Të jeni ai  që do ta reformojë Kosovën dhe do ta shpie në pjekuri, që do ta hapë drejt Evropës dhe botës duke e konsoliduar pozicionin e saj në skenën ndërkombëtare”.

Ndoshta, sipas gjasave, mundet që Isa Mustafa të veprojë si i madhi Ibrahim Rugova, të krijojë një koalicion paszgjedhur me AAK-në, t’ia japin postin e kryeministrit Ramush Haradinajt. Kjo si simbolikë e vazhdimësisë së hershme. Kjo si ekuilibrim politik i forcave politike të sotme të njoftuna si “të Luftës” apo “të Paqes”, etj. E, pas kësaj, ndoshta, akademikun Isa Mustafa e prêt posti i Presidentit të Republikës së Kosovës. Sidoqoftë, për herë të parë në historinë shqiptare do të kemi një kryeministër apo president shqiptar me titullin zyrtar “Akademik”, në rastin konkret:  i Akademisë së Shkencave e Arteve të Kosovës.

5.

Në përmbyllje të elektoriadës të LDK-së, deputeti i Bundestagut gjerman, Michael Brand, i dërguar i posaçëm i kancelares Angela Merkel, kryetare e CDU, partisë ma të fuqishme në Europë, i sapo ardhun në Kosovë, më 6 qershor 2014, përcjell  mesazhin mjaft domethanës: “Ne nuk duam dhe nuk do të lejojmë që krimi dhe korrupsioni të vijnë në Evropë. Një gjë është e qartë: ata që nuk e luftojnë korrupsionin dhe krimin i kanë të mbyllura dyert në Evropë”. Gjithçka shihet në dritë të diellit.  Qeveria dhe PDK-në e Thaçit, nuk paska hapa e forcë për integrimet euro-atlantike të Kosovës. Ka krye gjithato zullume në pushtet, thotë një analist. Po komandohet nga shërbimi sekret i luftës e i paqes, shton një tjetër. Disa figura të PDK-së po i pret Gjykata e re Ndërkomëtare e Drejtësisë në Kosovë, plotëson shumkush, etj.

Deputeti gjerman, Brand, i dërguari i kancelares Mërkel, mik i kahershëm i Kosovës, krahasimon kohën e sotme të Thaçit në qeverisje të shtetit të ri të pavarur të Kosovës, me kohën e Rugovës e LDK-së para disa vitesh. Pikërisht në vitet e vështira 1998-1999. Ai kumton me nostalgji e krenari kohën e Rugovës: “I kam parë, përjetuar dhe ndjerë aparteidin dhe shtypjen e përditshme të shqiptarëve...Dhe mund t’ju them se: njerëzit që i organizuan, LDK?ja me Presidentin Rugova, ju këtu në Kosovë dhe qindra mijëra në diasporë: me mjete paqësore, pa korrupsion dhe pa krim bëtë më të mirën që ishte e mundshme dhe reaguat me nder dhe dinjitet ndaj krimeve të Millosheviçit. Ju organizuat shkollat, shëndetësinë dhe ndihmën solidare. Sakrifikuat shumë për të ndihmuar të tjerët. Nuk i mbushët xhepat tuaj, përkundrazi. Me këtë ndryshuat historinë: mundët aparteidin dhe ndërtuat shtetin me mjete paqësore. Kjo rrugë paqësore dhe civile ju solli diçka që nuk mund të blihet me para: shumë respekt në të gjithë Evropën. E gjithë kjo sakrificë nuk meriton të shkojë dëm”.

Sigurisht nuk duhet harruar as ky fakt: Po flet Gjermania, mike e madhe e Kosovës, luftëtare e madhe e lirisë së saj. Për herë të parë pas Luftës së Dytë Botërore ushtarët gjermanë morën pjesë në një luftë, në luftën për çlirimin e mbrojtjen e Kosovës nga Serbia kolonizatore, nga genocidi i përgjakshëm e spastrimi etnik i egër i Millosheviçit. Ka derdh dhe gjakun e bijve të vet, sepse 23 gjermanë kanë dhanë jetën për Kosovën. Gjermania mike, prej se nga “Lufta e Kosovës” (1999) dekterit në ditë të sodit (2014), ka sjellë në Kosovë mbi 120.000 ushtarë. Kaq efektiv nuk i ka as partia e Thaçit, PDK-ja në pushtet qeverisës deri të dielën e 8 qershorit, që siç thotë analisti Skënder Buçpapaj: “bani zullume në pozitë, paftë hajr në opozitë”.

6.

Kit’ mandatin e fundit, Hashim Thaçi, kreu i ekzekutivit e prijtari i mazhorancës, shpeshtas iu ka çakordue busulla diplomatike, jo rrallë iu ngatrruen fishet politike. E hupi rrugën në oborr. E thirrke Erdoganin e Turqisë “vlla”(!) Edi Ramën e deklaronte “shok”(!) Daçiçin e Serbisë në tavolinë, marrëveshje e buzëqeshje e trajtonte si “kushëri”(!) Gjukanoviçin e Malit të Zi e cilësonte “mik”. E, sipas kësaj llogjike: pa gen e cen, pa cak e prag, i (keq)binte që euro-atlantikët në Bruksel e Uashington t’i kishte “kojshi”, etj.(!)

Sikur të mos mjaftonin të tilla luhama e pehama diplomatike e politike, kryesisht në vitet e fundit kryeministri Thaçi me qeverinë e partinë e tij, sipas akuzave në Kosovë e jashtë saj në dy anët e Atlantikut, shumë “asish” e “kësish” pothuaj i kullufiti e katandisi babëzia e korrupsionit dhe u mekën përballë ajzbergit e tërmetimeve të krimit, etj. E keqe e madhe që i manifestonin korrupsionin e krimin, etj. po e keqja edhe ma e madhe që nuk u luftuan ato. E, kësisoj, kështu, si i cekëm edhe ma nelt, Thaçin me qeverinë e partinë e tij nuk e duan në Europë, as në BE, as në NATO, as në KE, etj. pasi nuk duan t’iu shkojnë sëbashku me korrupsionin, me krimin, etj. O njëren, o tjetrën.

Ndaj LDK e Rugovës e Mustafës po merr kaq fort e shumë mbështetje ndërkombëtare, po shihet si e vetmja alternativë e perspektivë për integrimet euro-atlantike të Kosovës e zhvillimet e gjithanshme të saj. Presidenti i PPE, forcës ma të madhe politike në Parlamentin Europian, Zhozef Dol, tue parë dështimin e Thaçit si alternativë të zhvillimit e integrimit të Kosovës iu ban apel “trashëgimtarëve të “Gandit të Ballkanit” dhe “Babait të Kosovës’”, Ibrahim Rugova”, pasi sipas tij e BE, “kjo trashëgimi ka peshë, ka kërkesa dhe detyra të shumta. Por, kjo trashëgimi është edhe bartëse e shpresës”, etj. Historia po thërret në skenë simbolin kombëtar, shenjtërinë e tij, dr. Ibrahim Rugova dhe apostujt e tij, vazhduesit e Kauzës së tij, si lideri i sotëm i LDK-së, akademik Isa Mustafa.

Tashti Thaçi nuk po ka se kujt me ia shkel syrin...As syrin e majtë. As syrin e djathtë. Kurrnjanin. Po as ndërkombëtarët nuk po ia shkelin syrin...(!) Kurrkush. Thaçi ndodhet në vetminë e madhe. Atij po i largohet Europa...dhe Erdogani. Thaçi po i zbret nga shpina pushtetit politik në Kosovë. Për Thaçin e partinë e tij PDK  edhe opozita do të jetë e vështirë.