Demir Krasniqi: Mysafir te një mik i imi

Këngë mahie :

MYSAFIR TE NJË MIK I IMI

            Autor: Demir KRASNIQI

*****Sqarim për lexuesin :

Përmes vargjeve të kësaj kënge mahie, kam dashur që t’ua përkujtoj lexuesve të nderuar, se në të folmen e krahinave tona shpeshherë na paraqiten disa variante për të njëjtin emërtim, si p.sh. në këtë këngë i kam përfshirë emërtimet e ndryshme për stufën, kosin , qumështin, bostanin , kungullin e Misirit dhe emërtimet e ndryshme për vajzat .

Dikur moti në një stinë dimri ,

Shkova mysafir te një mik i imi ...

Për shkuarjen time , miku u gëzua fort ,

Na e ndezi zjarrin që t’ mos kem të ftohtë !

Na e ndezi kaftorrin , na e ndezi  stufën ,

Na e  ndezi  çymbetin  , na e ndezi kubën ...

Na e ndezi oxhakun , na e ndezi sobën ,

N’ tana anët me ngrohje na e mbushi  odën .

Nuk vonoi fort shumë dhe na e shtroi sofrën ,

Na e pruri ajranin , na e pruri kosin ,

Na e pruri llallën , na e pruri  jogurtin,

Na e pruri  tamblin , na pruri qumështin ...

Por edhe mbas buke s’ ndalej muhabeti –

Me pemë e perime seç shtohej lezeti !

Na pruri bostan , karpuz e shalqi ,

Hëngrëm edhe hëngrëm , nuk dinim me u ngi !

Kështu sipas traditës pritet mysafiri ,

Mikpritësi na poçi dhe kunguj Misiri .

Na pruri  qylaha , po edhe vidima –

Hani edhe pini , ju bëftë mirë  , o trima !

Pastaj krisi kënga , vallja e muzika –

Na u mbush oda vasha , vajza edhe çika ...

Na u mbush oda  çupa , cuca edhe  goca ,

Na u shtrua  rakia  dhe u ngritën gota !