Aurel Dasareti: Zemra Shqiptare

Zemra Shqiptare

Nga Aurel Dasareti, Australi (ekspert i shkencave psikologjike – ushtarake)

Në jetën reale nuk ka gjasa të gjenden regjime që funksionojnë të veçuar.

Shoqëritë e hapura dhe të mbyllura përbëjnë ideale të ushqyera nga popujt. Unë jam i zotuar tërësisht për një shoqëri shqiptare të hapur si formë e dëshirueshme e organizimit shoqëror. Por shoqëria e hapur si ideal nuk është pa cene. Paqëndrueshmëria, mungesa e vlerave, nuk janë tipare të këndshme. Ja përse shoqëria e hapur është aq e brishtë si ideal. Vizioni i ofruar nga shoqëritë e mbyllura është më joshës. Por në shoqëritë e mbyllura vizioni është mjaft larg realitetit; në shoqëritë e hapura është mjaftë afër. Për të marrë anën e shoqërisë së hapur duhet vlerësuar mospërputhja midis mendimit  dhe realitetit.

Ligji dhe rendi në trojet etnike nuk janë prishur plotësisht por autoritetet publike mendjen e kanë te fitimi privat. Çka ne e quajmë Mafie është në thelb një rrjet i ndërthurur ujdishë midis sipërmarrësve dhe nëpunësve shtetërorë. Është kjo anë e errët e sipërmarrjes së lirë. Nuk është kjo aspak një situatë joshëse, për mua është situatë e neveritshme. Njerëzit sillen si kapitalistë të egër, sepse kjo është e vetmja mënyrë për t`u bërë kapitalist në një shoqëri ku nuk ka ligje. Shumë prej tyre janë njerëz të ndershëm dhe arsimuar, dhe kjo gjendje nuk u pëlqen po aq sa mua. Po t`u jepet qoftë dhe një mundësi solide, ata do të bëheshin qytetarë të rregullt e të drejtë.

Lufta për pushtet midis kodoshëve shqipfolës është intensifikuar deri aty ku gjithçka mund të ngjasë. Në një vend ku populli është gati të vjedh çdo gjë, shteti vetë është objekt i më të shkathëtit. Mjerisht ka aty edhe fushata të bashkërenduara për të frikësuar median e për t`i mbyllur gojën atyre që thuan të vërtetën. Prandaj as që ka ndryshime pozitive. Në këtë terr informativ unë nuk pres që masat e gjëra të zgjohen, të ngrihen më këmbë e të veprojnë me të gjitha mjetet demokratike – ato mbeten të shumëvuajtura dhe pasive – por pres që media të luftojë me nder për pavarësinë e vet.

Për momentin faqja ”Zemra shqiptare” është më e mira në çdo aspekt. Lypset ta shfrytëzojmë mundësinë që nëpërmjet saj të informojmë masat për gjërat, sendet dhe ngjarjet e sakta. Themeluesi dhe redaksia bëjnë një punë të shkëlqyeshme; falas. Të gjithë ne që botojmë këtu, lypset të solidarizohemi me stafin, të mos i ngarkojmë për së tepërmi me punë të kotë. Sugjeroj të kufizohemi. Nuk ka nevojë të dërgojmë fotografi të shumta për çdo letër. Nuk ka nevojë të dërgojmë letra të pavlera të cilat ndonjëherë i shkruajmë kur jemi të mërzitur, përkundër faktit se të gjithë ju jeni shkrues të shkëlqyeshëm. Në këtë mënyrë do të solidarizohemi me redaksinë duke u dhënë mundësi të marrin frymë më lirisht sepse edhe ata kanë nevojë të kryejnë detyrat e veta familjare dhe jetësore. Mos bëhemi egoist, mos keqpërdorim mirësinë dhe bujarinë e atyre që na mundësojnë paraqitjet dhe komunikimin - për qejfet tona. Rekomandoj të shkruajmë më pak artikuj, mos bëhemi  bajat duke përsëritur vetveten, por, të komentojmë letrat e mirëfillta.

Ka raste kur dikush u klikon me mijëra herë letrave të veta edhe atë brenda disa minutash, vetëm me një qëllim: ta mashtroj vetveten kinse shkresa e tij është lexuar shumë më tepër se tjerat dhe na qenka më e mira.

Përpiqem të bëjë nxitje pozitive, ju lutem mos më keqkuptoni. Kuptohet se nuk jam avokati i faqes, jam vetëm pjesëmarrës që mendon e bluan, dhe të bluash don të thotë ta vësh veten jashtë temës për të cilën mendoni. Jam i prirur për të abstraktuar dhe më pëlqen t`i vështrojë gjërat, përfshirë edhe vetveten, nga jashtë.

Pranimi i papërcaktueshmërisë së lidhur me gabueshmërinë tonë mund të hapë perspektivën për përmirësim të pafund.

Respekt për ju,

dasaretiaurel@yahoo.com.au