Xhafer Leci: Gjilan - Bruksel, 5 milion hapa

GJILAN – BRUKSEL, 5 MILION HAPA TË VEGJËL, PËR NJË HAP TË MADH

Nga Xhafer Leci

Gjilan - Kirchheim-Teck, 55 ditë udhëtim në këmbë

Përfaqësuesit e grupit “Shtegtarët e Lirë”, Xhevdet Shabani, Nazim Ajdini, Jahi Mustafa dhe Liridon Basha, pas 55 ditë udhëtimi në këmbë, nga Gjilani i Kosovës arritën më 23.06.2014, në Kirchheim–Teck të Gjermanisë.

Një pamje e përbashkët e pjesëmarrësve të këtij takimi

Grupi u mirëprit nga kryesia e SHKSH-së „Kadri Zeka“, Taxhidin Bakiu, kryetar, Xhafer Leci, kryetar nderi, Selami Morina nënkryetar, Fatmir Krasniqi, arkëtar, dhe Bujar Osaj antarë i kryesisë.  Në këtë takim shumë të ngrohtë e vëllazëror muarën pjesë edhe Konsulli i Republikës së Kosovës, me seli në Stuttgart të Gjermanisë,  z. Faket Kajtazi, i shoqëruar nga zyrtari i Konsullatës z. Naser Bejtullahu; nga Shoqata   „ Malësia“ në Hechingen, Asim Loka, kryetar, Lulzim Dragusha, antar i kryesisë, Binak Dina, aktivist dhe invalid i luftës dhe Nexhmi Breznica musafir nga Kosova.

Nga „Qendra Kulturore Shqiptare“ me seli në Stuttgart, Vitor Spaqi, kyetar dhe Vilson Spaqi aktivist.

Para “Ateckhotel“në Kirchheim -Teck, sipas moshës të radhitur, nga e djathta: Xhevdet Shabani, Nazim Ajdini, Jahi Mustafa dhe Liridon Basha.

Në pyetjen tonë se cili është mesazhi i këtij udhëtimi kaq të gjatë dhe të mundimshëm, që nga Gjilani për në Bruksel, duhet të këtë mbi 2.500 kilometra rrugëtim, ata u përgjigjen: “Ne kemi përgaditur mesazhin me  shkrim, ku thuhet se: Edhe shqiptarët janë evropian dhe duhet cilësuar e trajtuar njësoj si të gjithë popujt tjerë në Evropë, si p.sh pse për ne qytetarët e Republikës së Kosovës ende nuk është promovuar liberalizimi i vizave…!

Pyetje: A keni ushtruar, stëvitur para se të fillonit udhëtimin?

Përgjigje: “Po jemi parapërgaditur disa muaj, kemi kondicion mjaft, kemi humbur peshë nga disa kilogram, ndërsa, Nazim Ajdini, luftëtar i plagosur në luftën e Pashtrikut, na thotë: Unë kam ushtruar shumë, edhe me rastin e 100 vjetorit të pavarësisë të Shqipërisë, kam udhëtuar me flamur në dorë, në këmbë, nga Gjilani në Vlorë…”.

Pyetje: Cilën ditë mendoni të arrini në Bruksel?

Përgjigje: “Me 17 Korrik si të jemi shëndosh e mirë, do të jemi në selinë e NATOs dhe të Bashkimit Evropian, dhe si moto kemi: 5 milion hapa të vegjël, për një hap të madh”.

Pyetje: A keni pasur probleme shëndetësore, apo të ndonjë natyre tjetër, gjatë udhëtimit dhe si ju kanë pritur mërgimtarët shqiptarë gjatë këtij udhëtimi?

Përgjigje: “Problem shëndetësore gjatë udhëtimit nuk kemi pasur, shqiptarët gjithkund na kanë pritur shumë mirë, duke na siguruar fjetjen, ushqimin e ndihma tjera. Gjithku na kanë pritur mirë edhe popujt e huaj, edhe policia e doganat, sidomos në Kroaci.

Një incident e kemi pasur ditën e parë të udhëtimit, kur kemi mbërri në Graçanicë, aty na kanë sulmuar një grup serbë, kishin qenë të dehur si duket, ata ishin duke dalur nga një kafene, na sulmuan, edhe ne qendruam, njërin e rraha me një ambrellë që kisha në dorë tha, – Nazmi Ajdini. Shpejt erdhen policia, shqiptarë e serbë, edhe kryetari i Komunës së Graçanicës.

Na muarën në pyetje që zgjati nga ora 20 deri në ora 24. Pasi na liruan, ne vazhduam udhëtimin…”.

Pyetje: Ju e bëni udhëtimin përmes telefonave të xhepit, të cilët kanë navigacionet elektronike për tu treguar rrugët e këmbësorëve?

Përgjigj: “Po ashtu është”.

Pyetje:  “Keni pasur pengesa nga fshatarët, duke ua shkelur ndonjëherë, livadhet, arat e mbjellura me grurë…

Përgjigje: “Pengesa nuk kemi pasur, por kemi pasur raste kur na është dashur të shkelim bereqetet, sigurisht se nuk u vinte mirë, por na toleronin. Ne u tregonim  për misionin e udhëtimit tonë, e flasim gjermanishten dhe anglishten”.

Pyetje: Nga sa kilometra udhtoni në ditje?

Përgjigje: “Mvarësisht, mesatarisht në ditje mbi 30 kilometra“.

Pyetje: A ju kanë ndihmuar materialisht dhe moralisht organet e pushtetit të Republikës së Kosovës?

Përgjigje: “Po na kanë ndihmuar, kryetari i Komunës së Gjilanit, z. Lutfi Haziri me 5,000 euro; Ministria e Diasporës me 3,000  euro dhe Ministria e Kulturës me 1,500 euro”.

Grupi “Shtegtarët e Lirë”, udhëtimin e kanë filluar më 30 prill 2014, nga Gjilani, nepër Mal të Zi, Kroaci, Slloveni, Austri, Gjermani dhe për të arritur në Bruksel të Belgjikës u duhen edhe 23 ditë udhëtim në këmbë, pra më 17 korrik 2014 arrijnë në Bruksel.

“Ky udhtim, ka edhe karakter Falënderimi e Mirënjohje, për bombardimet e NATO, të cilat zgjatën 78 ditë, derisa  e mposhtën, nështruan dhe turpëruan Serbinë okupatore dhe gjenocidiale.

Antarët e Krysisë të SHKSH-së “Kadri Zeka” me“Shtegtarët e Lirë”.

Dhe për fund, e falënderojmë kryetarin e SHKSH-së „Kadri Zeka“, zotin Taxhidin Bakiu, i cili, në shenjë respekti, për nder të Grupit “Shtegtarët e Lirë”, nga xhepi i tij personal, për të gjithë pjesëmarrësit e këtij takimi, shtroi darkë, siguroi dhomat për fjetjen e grupit në fjalë, në „Ateckhotel“, duke paguar një shumë të konsiderueshme parash”.

Në shenjë nderimi dhe respekti për „Shtegtarët e Lirë“ u grumbullua një ndihmë modeste nga:   SHKSH „Malësia“; SHKSH „Kadri Zeka“, QKSH në Stuttgart si dhe të pranishmit në darkën e shtruar për këtë rast.